شەتەلدەن 7 ايلىق بالا تابىلىپ، قازاقستانعا قايتارىلدى
استانا. KAZINFORM - ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى 7 ايلىق قازاقستان ازاماتىنىڭ رەسەي فەدەراتسياسىنان ەلگە ورالعانىن حابارلادى.
كەلگەن بويدا ءبۇلدىرشىن بالالار اۋرۋحاناسىنا قارالىپ، تەكسەرىلۋ ءۇشىن جاتقىزىلدى. قازىرگى ۋاقىتتا ونىڭ جاعدايى تۇراقتى. مەديتسينالىق شارالار اياقتالعان سوڭ نارەستە «بالالار ءۇيى» ك م م-نە جىبەرىلەدى. بالانى الىپ كەلۋ پروتسەسىنە ادىسكەر-قامقورشى جانە انەستەزيولوگ-رەانيماتولوگ قاتىستى.
«ءبىز ءۇشىن ءاربىر بالانىڭ قانداي جاعداي بولماسىن، قاجەتتى قولداۋ الۋى ماڭىزدى. سونداي-اق، ەلىمىزدىڭ ءاربىر ازاماتىنا بارىنشا قامقورلىق كورسەتىپ، قاۋىپسىزدىگىن قامتاماسىز ەتۋگە تىرىسۋدامىز. ءتيىستى ورگاندار مەن ماماندار كىشكەنتاي نارەستەنى ەلگە قايتارۋ ءۇشىن وراسان زور جۇمىس اتقاردى. وسى جاقتا ونىڭ ءوسىپ-جەتىلۋى ءۇشىن بىلىكتى ماماندار قولدان كەلگەننىڭ ءبارىن ىستەيدى»، - دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
«ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى بالالاردىڭ قاۋىپسىزدىگى مەن ءال-اۋقاتىن قامتاماسىز ەتە وتىرىپ، ولاردىڭ قۇقىقتارى مەن مۇددەلەرىن قورعاۋ جونىندەگى بەلسەندى جۇمىستى جالعاستىرۋدا. ءبىز قاجەت بولعان جاعدايدا بالالاردى وتانىنا قايتارۋ ءۇشىن بار كۇش-جىگەرىمىزدى سالامىز جانە ولاردىڭ كاسىبي مامانداردىڭ قامقورلىعىندا بولۋىن قامتاماسىز ەتەمىز»، - دەلىنگەن حابارلامادا.