شەتەلگە وقۋعا، جۇمىسقا نەمەسە كوشۋگە نيەتتى قازاقستاندىقتارعا قۇجات راسىمدەۋ ءتارتىبى ەسكەرتىلدى

مامانداردىڭ ايتۋىنشا، شەتەلدە قولدانىلاتىن ءبىرقاتار قۇجاتتىڭ زاڭدى كۇشى بولۋى ءۇشىن وعان اپوستيل ءراسىمىن جاساتۋ تالاپ ەتىلەدى.

- اپوستيل - قۇجاتتىڭ ءتۇپنۇسقالىعىن راستايتىن حالىقارالىق بەلگى. ول گااگا كونۆەنتسياسىنا قوسىلعان مەملەكەتتەردە قۇجاتتىڭ جارامدى ەكەنىن مويىنداتۋعا مۇمكىندىك بەرەدى، - دەپ ءتۇسىندىردى «ازاماتتارعا ارنالعان ۇكىمەتتىڭ» وكىلدەرى.

مەملەكەتتىك كورپوراتسيانىڭ مالىمەتىنشە، بيىل جىل باسىنان بەرى اپوستيل قويىلعان قۇجاتتاردىڭ اراسىندا مىنا ساناتتار كوپ كەزدەسەدى:

- ادىلەت ورگاندارى، مەملەكەتتىك ورگاندار جانە نوتاريۋستار بەرگەن قۇجاتتار؛

- مەكتەپتەر، كوللەدجدەر جانە تەحنيكالىق-كاسىپتىك ءبىلىم بەرۋ ۇيىمدارى بەرگەن قۇجاتتار؛

- پروكۋراتۋرا، تەرگەۋ جانە انىقتاۋ ورگاندارى راسىمدەگەن قۇجاتتار؛

- جوعارى وقۋ ورىندارى مەن جوعارى وقۋ ورنىنان كەيىنگى ءبىلىم بەرۋ ۇيىمدارى بەرگەن قۇجاتتار؛

- سوت ورگاندارى بەرگەن قۇجاتتار.

مەملەكەتتىك كورپوراتسيا ازاماتتارعا شەتەلگە شىعۋ الدىندا قاجەتتى قۇجاتتاردى الدىن الا تەكسەرىپ، راسىمدەۋ جۇمىستارىن ۋاقىتىلى جۇرگىزۋگە كەڭەس بەردى.

ەسكە سالايىق، 20-ماۋسىمدا جوعارى وقۋ ورىندارىنا قۇجات قابىلداۋ باستالدى.