ونىڭ ايتۋىنشا، 1990 -جىلعى 25 -قازاندا قابىلدانعان قازاق ك س ر- ءىنىڭ مەملەكەتتىك ەگەمەندىگى تۋرالى دەكلاراتسيا قازاقستاننىڭ تاۋەلسىز مەملەكەت رەتىندە قالىپتاسۋىنا نەگىز بولدى. قۇجاتتا قازاق حالقىنىڭ تاعدىرىنا جاۋاپكەرشىلىك الۋ، شەتەلدە تۇراتىن قازاقتاردىڭ مادەني جانە رۋحاني قاجەتتىلىكتەرىن قامتاماسىز ەتۋ، بيلىكتى ءبولۋ قاعيداتى جانە رەسپۋبليكا زاڭدارىنىڭ ۇستەمدىگى سياقتى ماڭىزدى ماسەلەلەر قامتىلدى.
وسى دەكلاراتسيا ارقىلى ءبىز تۇڭعىش رەت قازاق ۇلتى ءوز جاۋاپكەرشىلىگىن قولىنا الىپ، ءوز تىزگىنىن ءوزى ۇستايتىنىن، ىشكى ىستەرىن ءوزى رەتتەيتىنىن، زاڭدارىنىڭ ۇستەم بولاتىنىن جاريالادىق، - دەدى ءاليحان بايمەنوۆ.
سۇحبات بارىسىندا رەسپۋبليكا كۇنىنىڭ مارتەبەسى دە ءسوز بولدى. 1995 -جىلعى 18-قازاندا بۇل كۇنگە ۇلتتىق مەرەكە مارتەبەسى بەرىلدى. كەيىن ونىڭ مارتەبەسى وزگەرىپ، 2009 -جىلى مەرەكەلەر تىزىمىنەن الىندى. ال 2022 -جىلى رەسپۋبليكا كۇنى قايتادان ۇلتتىق مەرەكە بولىپ بەكىتىلدى.
ءاليحان بايمەنوۆتىڭ ايتۋىنشا، رەسپۋبليكا كۇنى ۇزاق مەرزىمدى ۇلتتىق مۇددە تۇرعىسىنان ماڭىزدى. ول قوعامدا اشىق پىكىرتالاس بولىپ، مەملەكەت ەل ءۇشىن وزەكتى ماسەلەلەردى حالىقپەن بىرگە تالقىلاۋى كەرەك ەكەنىن اتاپ ءوتتى. ۇزاق مەرزىمدى ۇلتتىق مۇددەنى ويلاساق، رەسپۋبليكا كۇنى ەشقاشان تاسادا قالماۋى كەرەك ەدى. اشىق قوعام بولماسا، مەملەكەت وزەكتى ماسەلەلەرىن حالىقپەن تالقىلاماسا، كوپ نارسە وسىلاي جەڭىل-جەلپى قابىلدانىپ كەتۋى مۇمكىن. ءبىز مەملەكەتتىك ساياساتتا پەندەلىكتەن بيىك تۇرۋىمىز كەرەك، - دەدى ول.
قايراتكەردىڭ سوزىنشە، رەسپۋبليكا كۇنى مەملەكەتتىڭ تىرەگى - ازامات ەكەنىن ەسكە سالسا، تاۋەلسىزدىك كۇنى ەلدىڭ ازاتتىعى مەن ەركىندىگىن ايقىندايدى. ازاماتتاردىڭ ءوز قۇقىقتارىن ەركىن جۇزەگە اسىرۋى دا مەملەكەتتىڭ نىعايۋىنا ىقپال ەتەدى. رەسپۋبليكا كۇنىندە ءبىرىنشى ورىندا ازاماتتىق تۇرسا، تاۋەلسىزدىك كۇنىندە ءبىرىنشى ورىندا ازاتتىق تۇرادى. رەسپۋبليكا كۇنىندە مەملەكەتتىڭ تىرەگى ازامات ەكەنىن، مەملەكەت ازاماتتارىمەن مىقتى بولاتىنىن ەسكە الۋىمىز كەرەك. ازامات ءوز مەملەكەتىندە ەركىن سەزىنىپ، قۇقىعىن جۇزەگە اسىرعاندا عانا ازاماتتىق جاۋاپكەرشىلىك قالىپتاسادى، - دەپ تۇيىندەدى ءاليحان بايمەنوۆ.