شەتەلگە ساياحاتتاماق بولعان اقمولالىق كۇتپەگەن جايتقا تاپ بولدى

استانا. قازاقپارات - شەتەلگە ساياحاتتاماق بولعان اقمولالىق تۇرعىن الاياققا الدانىپ قالدى، - دەپ حابارلايدى Massaget.kz ءتىلشىسى Polisia.kz سايتىنا سىلتەمە جاساپ.

تۋريستىك جولدامامەن الاياقتىقتى اقمولا وبلىسىنداعى پوليتسەيلەر تەرگەپ جاتىر. شەتەلدە جازعى دەمالىستى جوسپارلاۋ كەزىندە جاعىمسىز وقيعا ەلوردالىق قوسشى قالاسىنىڭ تۇرعىنىمەن بولدى. شىلدە ايىندا اقمولالىق ازامات Instagram الەۋمەتتىك جەلىسىنەن شەتەلگە تۋرلاردى ساتۋ جانە ۇسىنۋ پاراقشاسىن بايقاپ قالعان.

سودان قىزىعۋشىلىق تانىتقان ايەل وزىنە جانە وتباسىنا تۇركياعا 1296000 تەڭگە تۇراتىن تۋر تاپتى. سول كۇنى ءوتىنىش بەرۋشى ونلاين تولەم جاساعان. ال ساتۋشى جولدامالار كليەنتتىڭ ەلەكتروندىق پوشتاسىنا ءبىر تاۋلىك ىشىندە تۇسەتىنىن ايتقان. الايدا كەيىننەن اقمولالىق تۇرعىن بيلەتتەردى دە، اقشانى دا الماعان.

الاياققا تاپ بولعانىن بىلگەن ايەل قوسشى قالاسىنىڭ پوليتسيا بولىمىنە جۇگىندى. وسى فاكتى بويىنشا تەرگەۋشىلەر سوتقا دەيىنگى تەرگەۋدى باستادى، ال زاتتاي دالەلدەمەلەر رەتىندە حات-حابارلامالار مەن تولەم تۋرالى تۇبىرتەكتەر الىندى. 

ازىرگى ۋاقىتتا تەرگەۋ جالعاسىپ جاتىر. پوليتسيا قىزمەتكەرلەرى ايماق تۇرعىندارى مەن قوناقتارىن ينتەرنەت-دۇكەندەر نەمەسە الەۋمەتتىك جەلىلەر ارقىلى كەز كەلگەن تاۋارلار مەن قىزمەتتەردى ساتىپ الۋ كەزىندە قىراعى بولۋعا شاقىرادى. انىق-قانىعىنا كوز جەتكىزبەي، ءۇشىنشى تۇلعالارعا اقشا اۋدارماڭىز.