شەتەل جوعارى وقۋ ورىندارىمەن ستراتەگيالىق ارىپتەستىك جونىندەگى كەڭەس قۇرىلدى

استانا. KAZINFORM - شەتەلدىك ۋنيۆەرسيتەتتەرمەن ىنتىماقتاستىق اياسىندا ستراتەگيالىق ارىپتەستىك جونىندەگى كەڭەس قۇرىلدى.

بۇل تۋرالى ق ر پرەمەر-ءمينيسترىنىڭ ورىنباسارى تامارا دۇيسەنوۆا شەتەلدىك ۋنيۆەرسيتەتتەر باسشىلارىمەن كەزدەسۋدە مالىمدەدى.

مەملەكەت باسشىسىنىڭ تاپسىرماسىنا سايكەس، الەمنىڭ جەتەكشى ۋنيۆەرسيتەتتەرىمەن ستراتەگيالىق ارىپتەستىك ورناتۋ باعىتىندا بەلسەندى شارالار قولعا الىنعانى بەلگىلى. بۇگىندە ەلىمىزدىڭ ءتۇرلى ايماقتارىندا شەتەلدىك 23 وقۋ ورنى جۇمىسىن باستاپ كەتتى. ولاردىڭ باسشىلارىمەن كەزدەسۋدە ۆيتسە-پرەمەر قازاقستان تاراپىنىڭ ارىپتەستىك بايلانىستى نىعايتۋعا مۇددەلى ەكەنىن جەتكىزدى.

«ىنتىماقتاستىقتى دامىتۋ بويىنشا ۇسىنىستاردى تالقىلاپ، بىرلەسىپ ازىرلەۋ ماڭىزدى. وسى جۇمىستىڭ فورماتىن ساقتاپ، تۋىنداعان ماسەلەلەردى بىرلەسە قاراستىرعان ءجون دەپ سانايمىن. وسىعان بايلانىستى، عىلىم جانە جوعارى ءبىلىم مينيسترلىگى جانىنان ستراتەگيالىق ارىپتەستىك جونىندەگى كەڭەس قۇرۋ ۇسىنىلادى. اتالعان كەڭەس بارلىق قاتىسۋشىنىڭ مۇددەسىن ەسكەرە وتىرىپ، پىكىر الماسۋ جانە يننوۆاتسيالىق شەشىمدەردى ىزدەۋگە ارنالعان تۇراقتى الاڭعا اينالادى»، - دەپ اتاپ ءوتتى تامارا دۇيسەنوۆا.

قازىرگى ۋاقىتتا 20 دان استام ەلدىڭ ۋنيۆەرسيتەتتەرىمەن ءوزارا ءىس-قيمىلدىڭ ءتۇرلى فورماتتارى بار. كەزدەسۋدە ستراتەگيالىق سەرىكتەستىكتىڭ ءبىرىڭعاي جالپى ەرەجەسىن ازىرلەۋ قاجەتتىگى ايتىلدى. بۇل ۋنيۆەرسيتەتتەردەگى اكادەميالىق جانە باسقارۋ ەركىندىگىنە اسەر ەتپەيدى.

ۆيتسە-پرەمەر جان-جاقتى سەرىكتەستىك عىلىمي زەرتتەۋ ءىسىن دامىتۋعا، وزىق ءبىلىم بەرۋ باعدارلامالارى مەن ولاردى وقىتۋ ادىستەمەلەرى ترانسفەرتىن جۇزەگە اسىرۋعا باعىتتالاتىنىن اتاپ ءوتتى. وسىلايشا وقىتۋدىڭ جوعارى ستاندارتتارىن قامتامسىز ەتۋگە مۇمكىندىك تۋماق. سونداي-اق تامارا دۇيسەنوۆا بىرلەسكەن عىلىمي جوبالار اياسىنداعى ىنتىماقتاستىق جالعاساتىنىن باسا ايتتى.

«عىلىم جانە تەحنولوگيالىق ساياسات تۋرالى زاڭ بۇل باعىتتا قوسىمشا مۇمكىندىكتەر اشادى. باسەكەگە قابىلەتتىلىكتى ارتتىرۋعا ىقپال ەتەتىن عىلىمداعى جەتىستىكتەردى ەكونوميكا يگىلىگىنە قولدانۋ ءبىز ءۇشىن ماڭىزدى. بۇل ۇدەرىستە زەرتتەۋ ۋنيۆەرسيتەتتەرى شەشۋشى ءرول اتقارادى»، - دەدى تامار دۇيسەنوۆا.

كەزدەسۋ بارىسىندا شەتەلدىك جوعارى وقۋ ورىندارىنىڭ وكىلدەرى كەڭەس قۇرۋ جانە ستراتەگيالىق ارىپتەستىكتىڭ جالپى ەرەجەلەرىن ەنگىزۋ يدەياسىن قولدادى. سونىمەن قاتار ىنتىماقتاستىقتى ودان ءارى تەرەڭدەتۋ جونىندە پىكىر الماسۋ ءوتتى.

«جوعارى وقۋ ورىندارىنىڭ رەيتينگىن ءتۇزۋ مەن سارالاۋدى قالىپتاستىرۋ يدەياسىن قولدايمىن. باسەكەلەستىك - دامۋدىڭ نەگىزى»، - دەپ باسا ايتتى Heriot-Watt University رەكتورى مارك بيگگس.

اتالعان ج و و فيليالى ق. جۇبانوۆ اتىنداعى اقتوبە ۋنيۆەرسيتەتىنىڭ بازاسىندا اشىلدى.

ارىپتەسىن رەسەيدىڭ ميفي ۇلتتىق يادرولىق عىلىمي-زەرتتەۋ ۋنيۆەرسيتەتىنىڭ پرورەكتورى دميتري ساۆكين دە قولدادى.

«ماماندار دايارلاۋداعى بىرلەسكەن جۇمىس ءبىز ءۇشىن ماڭىزدى. سونداي-اق عىلىمي-زەرتتەۋ قىزمەتىندەگى ارىپتەستىكتى تەرەڭدەتۋگە مۇددەلىمىز»، - دەدى دميتري ساۆكين.