ىشكى ىستەر مينيسترلىگى وسى ماقساتتا پيلوتتىق جوبانى ىسكە قوستى.
جاڭا ءتارتىپ ىشكى ىستەر ءمينيسترىنىڭ 2026-جىلعى 2-قاراشاداعى 825-بۇيرىعىندا قاراستىرىلعان. قۇجاتقا سايكەس، قازاقستاندا ۋاقىتشا جۇرگەن شەتەل ازاماتتارى مەن ازاماتتىعى جوق ادامدار ج س ن راسىمدەۋ جانە ونداعى مالىمەتتەردى تۇزەتۋ قىزمەتىن QazETA موبيلدى قوسىمشاسى ارقىلى الا الادى. ول ءۇشىن MAQ كوشى-قون قىزمەتتەرىنىڭ سيفرلىق پلاتفورماسى پايدالانىلادى.
قىزمەتتى پايدالانۋ ءۇشىن الدىمەن QazETA قوسىمشاسىنا تىركەلۋ قاجەت. تىركەلۋ كەزىندە ءوتىنىش بەرۋشى جەكە دەرەكتەرىن جيناۋعا جانە وڭدەۋگە كەلىسىم بەرىپ، جەكە باسىن كۋالاندىراتىن قۇجاتىن تەلەفون كامەراسىنا تۇسىرەدى. سونداي-اق بيومەتريالىق سايكەستەندىرۋدەن وتەدى.
ودان كەيىن قوسىمشادان شەتەل ازاماتتارى مەن ازاماتتىعى جوق ادامدارعا ج س ن بەرۋ جانە ونى تۇزەتۋ قىزمەتىن تاڭدايدى.
جۇيە الدىمەن ءوتىنىش بەرۋشىنىڭ قازاقستانعا كىرگەنى تۋرالى مالىمەتتەردى تەكسەرەدى. سودان سوڭ پايدالانۋشى ءوزىنىڭ ورنالاسقان جەرىن راستاپ، جەكە باسىن قوسىمشا تەكسەرۋدەن وتەدى. اۆتوماتتى تۇردە تولتىرىلعان مالىمەتتەردىڭ دۇرىستىعىن تەكسەرىپ، تۋعان جەرىن، بايلانىس دەرەكتەرىن جانە ۇلتىن كورسەتۋى كەرەك.
ءوتىنىش ىشكى ىستەر مينيسترلىگىنىڭ اقپاراتتىق جۇيەسىنە تۇسەدى. وندا جاۋاپتى قىزمەتكەر قۇجاتتاردىڭ دۇرىس تولتىرىلعانىن، مالىمەتتەردىڭ سايكەستىگىن جانە ءوتىنىش بەرۋشىنىڭ اتىنا بۇرىن ج س ن تىركەلگەن-تىركەلمەگەنىن تەكسەرەدى.
مەملەكەتتىك قىزمەت ءبىر جۇمىس كۇنى ىشىندە كورسەتىلەدى. ءوتىنىش بەرىلگەن كۇن بۇل مەرزىمگە ەسەپتەلمەيدى.
ءوتىنىش ناتيجەسىن QazETA قوسىمشاسىنان كورۋگە بولادى. پايدالانۋشى ءوتىنىشىنىڭ مارتەبەسىن تەكسەرىپ، ج س ن تۋرالى مالىمەت الا الادى. تىركەۋ كۋالىگى بولعان جاعدايدا ونى PDF فورماتىندا جۇكتەپ الۋعا مۇمكىندىك بار.
ءوتىنىش بەرۋشىنىڭ دەرەكتەرى بەلگىلەنگەن تالاپتارعا ساي كەلمەسە نەمەسە ۇسىنىلعان قۇجاتتار مەن مالىمەتتەر جالعان بولسا، قىزمەت كورسەتۋدەن باس تارتىلۋى مۇمكىن.
پيلوتتىق جوبا 2026-جىلعى 9-قاراشادان باستاپ ءبىر جىل بويى جۇزەگە اسىرىلادى.
بۇعان دەيىن شەتەلدىكتەرگە جەكە سايكەستەندىرۋ ءنومىرىن بەرۋ قاعيدالارىن وزگەرتۋ ۇسىنىلعانىن حابارلاعان ەدىك.