شەرزاتتىڭ ءولىمى: قاماۋعا الىنعان كۇدىكتىنىڭ تۋىستارى مالىمدەمە جاسادى

قونايەۆ. KAZINFORM - تالعارداعى 16 جاستاعى شەرزات بولاتتىڭ ولىمىنە قاتىستى كۇدىكتى دەپ تانىلعانداردىڭ تۋىستارى ۆيدەوۇندەۋ جولدادى.

قاماۋعا الىنعانداردىڭ تۋىستارى حالىقتان كەشىرىم سۇرادى. سونىمەن بىرگە ولار مارقۇمنىڭ اكەسى مەن اعاسى دا جاۋاپقا تارتىلۋى كەرەك ەكەنىن العا تارتتى.

ولاردىڭ ايتۋىنشا، قارۋدى العاشقى بولىپ شەرزاتتىڭ اعاسى نۇرقانات الىپ شىققان. سونداي-اق ولار شەرزاتتىڭ سول جەردەگى جىگىتتەردىڭ ءبىرىنىڭ جاعىن سىندىرعانىن ايتادى.

«قارۋدى ءبىرىنشى نۇرقانات كولىگىنەن الىپ شىققان. بالالارعا قاراي وق اتقان. بالالار تىنىش تۇرعان جەرىنەن شەرزات مارقۇم ءبىر بالانىڭ جاعىن سىندىردى. ويلاماعان جەردەن ۇرىپ جىبەرگەن. وزدەرى مىلتىق پەن پىشاق الىپ شىققان. سودان جىگىتتەر كوتەرىلىپ كەتكەن. كەشىرىم سۇرايمىز بالالارىمىز ءۇشىن. بىزدىكى دۇرىس ەمەس. ءبىراق بالالاردى ارانداتپاسا بارلىعى تىنىش شەشىلىپ، بارلىعى ۇيىنە كەتەتىن ەدى. ولار شەرزاتتى ولتىرەمىز دەپ بارعان جوق»، - دەيدى ۆيدەوۇندەۋ جولداعان ايەل.

ۆيدەوۇندەۋ جاساعاندار شەرزاتتىڭ اكەسىن حالىقتى دۇرلىكتىرىپ، جالعان اقپارات تاراتتى دەپ ايىپتاپ وتىر.

«قارجاۋباي باسىنان باستاپ وتىرىك ايتتى. قارجاۋباي پىشاق الىپ كەلدى مە، جىگىتشە مويىنداسىن. قارجاۋبايدى دا قاماسىن. قارجاۋبايدىڭ ايەلى مە، قارىنداسى ما نۇرقانات اتقان وقتاردى جەردەن تەرىپ العان. ول دا جاۋاپكەرشىلىككە تارتىلسىن. اشىق سوت بولسا بارىنە بىردەي بولسىن. ءبىز سونى تالاپ ەتەمىز»، - دەيدى كۇدىكتىلەردىڭ تۋىستارى.

ەسكە سالايىق، 4-قازاندا تالعار قالاسىنداعى توبەلەستەن ءبىر ادام قايتىس بولعانىن جازعانبىز.

اشۋلى تالعارلىقتار جاس ءوسپىرىم ولىمىنە بايلانىستى نارازىلىققا شىقتى.

12-قازان تۇندە قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

كەيىن ىشكى ىستەر مينيسترلىگىنىڭ وكىلدەرى ب ا ق قىزمەتكەرلەرىنە شەرزات بولات قازا تاپقان جەردە كامەراعا ءتۇسىپ قالعان ۆيدەونى كورسەتتى.

پروكۋراتۋرا سوتتىڭ اشىق ءوتۋىن سۇرايتىندارىن جەتكىزدى.

اۆتور
الما مۇقانوۆا