شەرزات سوتىندا ايىپتالۋشى پىشاقتىڭ كىمدە بولعانىن ايتتى

تالدىقورعان. KAZINFORM - جەتىسۋ وبلىسىنىڭ مامانداندىرىلعان اۋدانارالىق سوتىندا قارالىپ جاتقان شەرزات پولاتتىڭ ولىمىنە قاتىستى قىلمىستىق ءىس بويىنشا سوتتالۋشى راۆيل ساكيەۆ جاۋاپ بەردى.

سوتتا ساكيەۆ 2024-جىلى وقيعا بولعان كۇنى دوسى نۇرقياسپەن بىرگە «ەيفوريا» مەيرامحاناسىنا بارعانىن ايتتى.

سول جەردە ءول بىر كۇن بۇرىن تانىسقان دانا جانە ەلميرا ەسىمدى قىزداردى شاقىرعان. ءبىراز ۋاقىتتان كەيىن ولاردىڭ جانىنا ابزال قوسىلىپ، كەشكى ساعات 21:00 شاماسىندا قىزدار دا كەلگەن.

وتىرىس بارىسىندا ازامات پەن شىڭعىس، سونداي-اق ازاماتتىڭ اعاسى نۇربول مەن دۋمان دا مەيرامحاناعا كەلىپ كەتكەن.

ساكيەۆتىڭ ايتۋىنشا، مەيرامحانا جابىلار ۋاقىتتا ول ەسەپتەسىپ، ەلميرامەن بىرگە سوڭعى بولىپ سىرتقا شىققان. قىزداردى ۇيىنە جەتكىزىپ سالۋعا نيەتتەنگەن ول، بارلىعى شىڭعىستىڭ كولىگىنە وتىرىپ، قالا ىشىندە ءجۇرىپ كەلە جاتقاندا «قاماجاي» دۇكەنىنە توقتاعان. سول ساتتە كولىكتەگىلەردىڭ ەشقايسىسى وعان نۇربولدىڭ بىرەۋمەن ەرەگەسكەنى جونىندە ەسكەرتپەگەن.

- مەن دۇكەنگە كەلدىك دەپ ويلادىم. كولىكتەن تۇسكەندە ءبىر جاعدايدىڭ بولىپ جاتقانىن بايقادىم. سول جەردە نۇرقانات عايىپبايەۆ ماعان جاقىنداپ، «مەنىڭ ءىنىم شەرزات سەندەردىڭ ءبىر بالالارىڭدى ۇرىپتى» دەپ دارحاندى كورسەتتى. مەن ول ادامدى تانىمايتىنىمدى، بۇل وقيعاعا قاتىسىم جوعىن ايتتىم، - دەدى سوتتالۋشى.

ساكيەۆتىڭ سوزىنە قاراعاندا، دۇكەن ماڭىندا تۋىنداعان جانجالدىڭ سوڭى توبەلەسكە ۇلاسقان. سول ساتتە بەلگىسىز تۇستان وق اتىلىپ، ول قاراڭعى جاققا قاراي جۇگىرگەن.

- مىلتىق اتىلدى دەگەندە جۇگىرىپ بارىپ، جەردە جاتقان بوتەلكەنى الدىم. سول كەزدە نۇرقاناتتىڭ تاعى دا مىلتىقتى وقتاپ جاتقانىن كوردىم. «مىلتىعىڭدى تاستا!» دەدىم. ول ەكىنشى رەت اتتى. مەن كولىكتىڭ ارتىنا تىعىلىپ، بوتەلكەنى لاقتىردىم، تيمەدى. كەيىن تاعى مىلتىقتى وقتاپ جاتقانىن كورىپ، جۇگىرىپ بارىپ مىلتىققا جارماستىم. سول ساتتە ول مىلتىقتى تارتىپ قالىپ، مەن قۇلادىم… نۇرقاناتتى ەكى-ءۇش رەت تەپتىم. سول ساتتە ءبىر ايەل ادامنىڭ قاتتى داۋسى شىقتى. سودان كەيىن كاپيۋشونىمدى كيىپ، ءبىرىنشى بولىپ وقيعا ورنىنان كەتىپ قالدىم. ارتىمنان باسقالارى ءبىر مينۋت بولماي جۇگىرىپ كەلىپ، كولىكتىڭ الدىنا وتىردى. مىلتىقتى ابزال مەن ازاماتتىڭ الدىنا سالعانىن كوردىم. «777» دۇكەنىندە مەن كولىكتەن تۇسپەدىم. ابزال سول جەردە ماعان «ءبىر بالانى پىشاقتاپ جىبەردىم» دەدى، كەيىن ونىڭ نۇرقانات ەكەنىن ءبىلدىم، -دەپ ەسكە الادى سوتتالۋشى.

كەلەسى سوت وتىرىسى 2025-جىلدىڭ 21، 22، 23-مامىردا ساعات 10:00 دە وتەدى.

ەسكە سالا كەتەيىك، شەرزات پولاتتىڭ ولىمىنە قاتىستى بۇگىنگى سوتتا تاعى ءبىر سوتتالۋشى ايىپتاۋ اكتىسىمەن كەلىسپەيتىنىن ايتقان.

تاعى ءبىر سوتتالۋشى نۇرقياس ءىلياسوۆ مىلتىقپەن ۇرۋ سەبەبىن تۇسىندىرسە، ازامات توقتاۋبايەۆ وتىرىك ايعاق بەرگەنىن راستادى.

كامەلەتكە تولماعان تاعى ءبىر ايىپتالۋشى دۋمان ىسقاق وزىنە تاعىلعان ايىپتى مويىندامادى.

ايتا كەتەيىك، شەرزات پولاتتىڭ ءولىمى بويىنشا العاشقى سوت وتىرىسىندا پروكۋرور وقيعانىڭ تولىق حرونولوگياسىن باياندادى.