شەرزات سوتى: سوت مورالدىق وتەماقى تولەۋگە مىندەتتەدى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا 16 جاستاعى شەرزات پولاتتىڭ ولىمىنە قاتىستى قىلمىستىق ءىس بويىنشا ۇكىم جاريالاندى.

سوت شەشىمىمەن ازاماتتىق تالاپتىڭ ءبىر بولىگى قاناعاتتاندىرىلدى.

جابىرلەنۋشىلەر قارجاۋباي نۇرىموۆ، گۇلبارا بيشىمبيەۆا جانە جۇمابيكە قاديروۆا ءارقايسىسىنىڭ پايداسىنا ابزال شىناسىلدان 20 ميلليون تەڭگەدەن مورالدىق وتەماقى ءوندىرىلسىن دەپ شەشىلدى.

سونىمەن قاتار مەملەكەت پايداسىنا 1981 تەڭگە كولەمىندە مەملەكەتتىك باج سالىعى الىنادى.

راۆيل ساكيەۆتەن قارجاۋباي نۇرىموۆ جانە جۇمابيكە قاديروۆاعا ءارقايسىنا 15 ميلليون تەڭگە مورالدىق وتەماقى، سونداي-اق 1981 تەڭگە مەملەكەتتىك باج سالىعى ءوندىرىلسىن.

شىڭعىس بەلعوجايەۆ، نۇرقياس ءىلياسوۆ، دارحان اسكەنتاي، نۇربول توقتاۋبايەۆ، ديدار قالياحمەت، ازامات توقتاۋبايەۆ جانە راۆيل ساكيەۆ ورتاق جاۋاپكەرشىلىكپەن گۇلبارا بيشىمبيەۆانىڭ پايداسىنا 10 ميلليون تەڭگە كولەمىندە مورالدىق وتەماقى تولەيتىن بولادى.

ش. بەلعوجايەۆ، ن. ءىلياسوۆ، د. اسكەنتاي، ن. توقتاۋبايەۆ، د. قالياحمەت، ا. توقتاۋبايەۆتان جابىرلەنۋشى قارجاۋباي نۇرىموۆ پەن جۇمابيكە قاديروۆانىڭ پايداسىنا دا ورتاق جاۋاپكەرشىلىكپەن 10 ميلليون تەڭگەدەن وتەماقى تولەۋگە مىندەتتەلدى.

بۇعان دەيىن، ايىپتاۋشىلارعا قانداي جازا تاعايىندالعانىن جازعان بولاتىنبىز.

اۆتور

تاستان تويانوۆ