شەرزات ءىسى: سوتتالۋشى دۋمان ىسقاق وزىنە تاعىلعان ايىپتى مويىندامادى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە قاتىستى سوت وتىرىسى ءوتىپ جاتىر.

كەزەكتى سوتتتالۋشى كامەلەت جاسىنا تولماعان دۋمان ىسقاق جاۋاپ بەردى. ادۆوكات سوتتالۋشىدان وقيعا قالاي باستالعانىن ايتىپ بەرۋدى سۇرادى.

دۋمان ىسقاقتىڭ ايتۋىنشا، نۇربول توقتاۋبايەۆ «كىشكەنە ىشىمدىك ءىشىپ الىپ ەدىم، كولىك جۇرگىزەتىن ەشكىم جوق» دەپ كومەكتەسۋىن وتىنگەن.

- ۇلكەن كىسى بولعاننان كەيىن كولىك ايداۋعا ءوز ەركىممەن كەلىستىم. كەيىن رىسقۇلوۆ اۋىلىنان تالعار اۋىلىنا ەكەۋىمىز بىرگە كەلدىك. نۇربول «دوسىم ازاماتتى اپارىپ تاستاعان سوڭ سەنى تاكسيگە وتىرعىزىپ جىبەرەمىن» دەدى. نۇربول جولدا شىڭعىس بەلعوجايەۆقا قاي جەردە ەكەنىن ءبىلۋ ءۇشىن حابارلاسىپ، سول جەرگە باراتىنىمىزدى ايتتى. مەيرامحانا الدىندا دارحان دەگەن دوسىن ۇرىپ كەتكەنىن ايتىپ، سول جەرگە بارامىز دەدى. وقيعا باستالعاندا «نۇربول اعا، ءبارى تىنىش ەكەن عوي، ۇيگە قايتايىقشى» دەپ ءوتىندىم، - دەدى سوتتا دۋمان.

ايىپتالۋشىنىڭ ايتۋىنشا، قارجاۋبايمەن ەشقانداي كەلىسپەۋشىلىك بولماعان، سوندىقتان قارجاۋبايدىڭ وسى سوتتا وقيعانىڭ قالاي باستالعانى جايلى نۇسقاسىمەن كەلىسەدى.

ادۆوكاتتىڭ سۇراعىنا جاۋاپ بەرگەن سوتتالۋشى دۋمان ىسقاق ءوز سوزىندە قىلمىستىق كودەكستىڭ 434-بابىمەن (اسا اۋىر قىلمىستى حابارلاماۋ) ايىپتالىپ وتىرعانىن، ءبىراق ءوز كىناسىن مويىندامايتىنىن ايتتى.

سونىمەن قاتار سول ءتۇنى وقيعانىڭ قالاي وربىگەنىن جاڭالىقتاردان عانا كورگەنىن مالىمدەدى.

ەسكە سالا كەتەيىك، شەرزات پولاتتىڭ ءولىمى بويىنشا العاشقى سوت وتىرىسىندا پروكۋرور وقيعانىڭ تولىق حرونولوگياسىن باياندادى.

بىلتىر 4-قازان كۇنى توبەلەستەن 16 جاستاعى جاس ءوسپىرىم قازا بولعانىن جازعان ەدىك.