شەرزات ءىسى: سوتتا وقيعا ورنىنا العاش بارعان پوليتسەيلەر كۋالىك بەردى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسى ءوتىپ جاتىر.

سوت وتىرىسىندا 4-قازان كۇنى وقيعا ورنىنا ءبىرىنشى بولىپ بارعان پاترۋلدىك پوليتسيا قىزمەتكەرلەرى كۋاگەر رەتىندە جاۋاپ بەردى. تالعار اۋدانى پوليتسيا باسقارماسىندا روتا پاترۋلدىك پوليتسيا قىزمەتكەرى جانىبەك ءامىراقىننىڭ ايتۋىنشا، ولار سول ءتۇنى كۇدىكتى دارحان اسكەنتايدى ۇستاعان.

- 4 ى كۇنى ساعات 00:42 شاماسىندا جەدەل كەزەكشىنىڭ نۇسقاۋى بويىنشا تالعار قالاسى مەندەلەيەۆ كوشەسىنە «توبەلەس بولىپ جاتىر» دەپ حابارلاما ءتۇستى. سول جەرگە 7-8 مينۋت ارالىعىندا باردىم. ونى ىشكى ىستەر مينيسترلىگى تەكسەرىپ، GPS ارقىلى دالەلدەنگەن. بارعاندا جولدىڭ ورتاسىندا Ravon اۆتوكولىگىن كوردىم. ءارى قاراي رۋستاۆەللي كوشەسىنە قاراي بۇرىلىس بار، سول جاقتا ءبىر توپ اداممەن سويلەستىم. ءمان-جايدى ءبىلدىم. ودان كەيىن جەردەگى قاندى كوردىم. ادامدار «ءبىر بالا پىشاقتالعان، ونى اكەسى ەمحاناعا الىپ كەتتى» دەدى. تاعى سۇراي باستاعان كەزدە Golf جانە Mercedes-Benz كولىكتەرى تۋرالى ايتتى. ونىڭ بارلىعىن كەزەكشى بولىمگە حابارلاسىپ، ايتىپ بەردىم. كەيىن جەدەل تەرگەۋ توبى كەلدى. ءارى قاراي كەزەكشىنىڭ نۇسقاۋىمەن ارالاۋعا شىقتىق. رىسقۇلوۆ اۋىلىن قاراي جۇرگەن كەزدە Golf اۆتوكولىگىن كوردىك. ىشىندە ەشكىم بولمادى. ءبىز كەزەكشىگە حابارلاسىپ، كولىكتى تاپقانىمىزدى ايتتىق. سول كەزدە ءبىر جىگىتتى بايقادىق. ارىپتەسىمىز ەكەۋمىز ونى ۇستادىق. ول «ءيا، مەندەلەيەۆ كوشەسىندە بولدىم، توبەلەسكە قاتىسىم بار» دەدى. ول دارحان اسكەنتاي بولىپ شىقتى. ەكىنشى ەكيپاجدى شاقىردىق، ولار (كۇدىكتىنى) تالعار اۋدانى پوليتسيا باسقارماسىنا اپارىپ تاستادى، - دەدى ول.

پروكۋرور كۋاگەردەن كۇدىكتى د. اسكەنتاي ۇستالعان كەزدە قانداي كۇيدە بولعانىن سۇرادى.

- كوزى ءىسىپ كەتكەن. الكوگولدىك ىشىمدىكتىڭ ءيىسى سەزىلدى، - دەدى جانىبەك ءامىراقىن.

سونداي-اق ول قىزمەت بارىسىندا پوليتسيا بەينەجەتونى نەلىكتەن ىستەمەگەنىن ءتۇسىندىردى.

- بەينەجەتون بار. سول كەزدە تالعار اۋدانى پوليتسيا باسقارماسى ىشىندە قۇرىلىس جۇرگىزىلۋىنە بايلانىستى بارلىق اپپارات شىعارىلىپ تاستالعان بولاتىن. سول ءۇشىن ىستەمەدى، - دەدى ول.

سوتتا كەلەسى بولىپ تالعار اۋدانى پوليتسيا باسقارماسى روتا پاترۋلدىك پوليتسيا ينسپەكتورى داۋرەن قۇرامىسوۆ جاۋاپ بەردى.

فوتو: ۆيدەودان الىنعان سكرين

- شامامەن 00:42-دە كەزەكشى بولىمىنەن قوڭىراۋ شالدى. مەندەلەيەۆ كوشەسىندە توبەلەس تۋرالى حابارلاندى. ءبىز سول كەزدە قونايەۆ كوشەسىندە ناركولوگيادا بولعانبىز. 7-8 مينۋت ارالىعىندا «قاماجاي» دۇكەنى الدىنا كەلدىك. وندا ءبىر توپ ادام بولدى. ءارى قاراي بىلگەنىمىزدى كەزەكشى بولىمگە بايانداپ، جەدەل تەرگەۋ توبىن كۇتتىك. وقيعا ورنىندا 4-5 جاس بالا بولدى. مەن ولاردان نە بولعانىن سۇرادىم. باسىنان قان اعىپ تۇرعان بالا بىرەۋ ۇرعانىن ايتتى. باسقا ۇلكەن كىسىلەر كەلىپ، «پىشاقتالدى»، «مىلتىق اتىلدى» دەپ ايتتى جانە Volkswagen كولىگى مەن Mercedes كولىگى كەتىپ قالعانىن ايتتى. ءبىز كەلگەننەن كەيىن 2-3 مينۋتتا جەدەل جاردەم، ودان كەيىن جەدەل تەرگەۋ توبى كەلدى. سوسىن كەزەكشىلىك بولىمىنەن Volkswagen جانە Mercedes كولىكتەرىن ۇستاۋ تۋرالى بىزگە باعىتتاما بولدى. Volkswagen كولىگىن رىسقۇلوۆ اۋىلىندا كوردىك. ونى كەزەكشى بولىمگە بايانداپ، كۇزەتىپ وتىردىق. سول كەزدە ەر ازاماتتى بايقادىق. ول ءوزىن دارحان اسكەنتاي دەپ تانىستىردى. ىشىمدىكتىڭ ءيىسىن سەزدىم جانە ءبىر كوزى كوگەرگەن بولدى، - دەدى ول.

سونىمەن قاتار پروكۋرور سۇراعىنا جاۋاپ بەرگەن كۋاگەر «قاماجاي» دۇكەنى ىشىندە شەرزاتتىڭ اجەسىن كورگەنىن ەسىنە الدى.

- دۇكەن ىشىنە كىرگەن كەزدە اپا وتىردى. ول كىسى «بالام امان با» دەپ سۇرادى. مەن «بالاڭىز امان، ۋايىمداماڭىز» دەپ شىعىپ كەتتىم. مەن باسى جارىلعان بالا دەپ ويلاپ قالدىم، - دەدى داۋرەن قۇرامىسوۆ.

كەشە سوت وتىرىسىندا كۋاگەر ەلميرا نۇربەكوۆا جاۋاپ بەردى.

ودان كەيىن ەكىنشى كۋاگەر قىز دانا جاقسىگەلدى وقيعا تۋرالى باياندادى.

بۇعان دەيىن سوتتا شەرزاتتىڭ اكەسى قارجاۋباي نۇرىموۆ ول كيكىلجىڭ قالاي باستالعانىن ايتقان ەدى.

شەرزاتتىڭ اناسى گۇلبارا بەيشەمبيەۆا دا قايعىلى وقيعا قالاي بولعانىن ەسكە الدى.

ەسكە سالايىق، پروكۋرور وقيعانىڭ تولىق حرونولوگياسىن باياندادى.

ايىپتالۋشىلاردىڭ كوپشىلىگى كىنانى مويىنداعان جوق.

بىلتىر 4-قازان كۇنى توبەلەستەن 16 جاستاعى جاس ءوسپىرىم قايتىس بولعانىن جازعان ەدىك.

2024 -جىلدىڭ 12-قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

2024 -جىلدىڭ جەلتوقسان ايىندا تالعار ماڭىندا شەرزات پولاتتىڭ اعاسى ءولى تابىلدى.

بيىل اقپان ايىندا شەرزات ىسىنە قاتىستى قىلمىستى تەرگەۋ اياقتالدى. قىلمىستىق ءىس 62 تومنان تۇرادى. تەرگەۋ بارىسىندا 40 سوت ساراپتاماسى جۇرگىزىلىپ، شامامەن 200 كۋاگەردەن جاۋاپ الىنعان.

اۆتور

الما مۇقانوۆا