شەرزات ءىسى: كۋاگەر ەلميرا نۇربەكوۆادان جاۋاپ الىنىپ جاتىر

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى كەزەكتى سوت وتىرىسى ءوتىپ جاتىر. قازىر كۋاگەر ەلميرا نۇربەكوۆا جاۋاپ بەرىپ جاتىر.

بۇعان دەيىنگى سوت وتىرىسىنا ەكى ايەلدىڭ ءبىرى ەلميرا نۇربەكوۆا كۋاگەر رەتىندە قاتىستى. ول ورىس تىلىندە جاۋاپ بەرەتىنىن ايتىپ، اۋدارماشىنىڭ كومەگىنە جۇگىنگەن ەدى.

بۇگىن جابىرلەنۋشىنىڭ وكىلى كۋاگەردەن تالعارداعى قاي مەكتەپتە وقىعانىن سۇرادى. ادۆوكات ەلميرا نۇربەكوۆانىڭ بۇعان دەيىن تەك قازاق تىلىندە جاۋاپ بەرگەنىنە سوتتىڭ نازارىن اۋداردى.

ءىستى قاراپ جاتقان سۋديا ەرجان جانۇزاقوۆ كۋاگەرگە ورىس تىلىندە جاۋاپ بەرۋگە رۇقسات بەرىلگەنىن ەسكە سالدى.

- مەن سوتقا دەيىنگى تەرگەۋ بارىسىندا ورىس تىلىندە جاۋاپ بەردىم. سونداي-اق بىزدەن ەكى كۇن بويى 100 گە جۋىق ادام جاۋاپ الدى. مەن تەزىرەك قولىمدى قويىپ كەتۋگە اسىقتىم، - دەدى ەلميرا نۇربەكوۆا.

قازىر سوتتا كۋاگەر ەلميرا نۇربەكوۆانىڭ سوتقا دەيىنگى تەرگەۋ بارىسىندا بەرگەن جاۋابى تۇسىرىلگەن ۆيدەو كورسەتىلىپ جاتىر. وندا ول قازاق تىلىندە جاۋاپ بەرىپ وتىر.

ايتا كەتەيىك، كۋاگەر وتكەن سوت وتىرىسىندا، بۇگىن دە ورىس تىلىندە جاۋاپ بەرىپ جاتىر.

بىلتىر 4-قازان كۇنى توبەلەستەن 16 جاستاعى ءجاسوپىرىم قايتىس بولعانىن جازعان ەدىك.

2024 -جىلدىڭ 12-قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

2024 -جىلدىڭ جەلتوقسان ايىندا تالعار ماڭىندا شەرزات پولاتتىڭ اعاسى ءولى تابىلدى.

بيىل اقپان ايىندا شەرزات ىسىنە قاتىستى قىلمىستى تەرگەۋ اياقتالدى. قىلمىستىق ءىس 62 تومنان تۇرادى. تەرگەۋ بارىسىندا 40 سوت ساراپتاماسى جۇرگىزىلىپ، شامامەن 200 كۋاگەردەن جاۋاپ الىنعان.