شەرزات ءىسى: اپەللياتسيالىق سوت ۇكىمدى وزگەرىسسىز قالدىردى

قوناەۆ. KAZINFORM - الماتى وبلىستىق سوتىنىڭ عيماراتىندا شەرزات پولاتتىڭ ولىمىنە قاتىستى اپەللياتسيالىق سوت ءوتتى.

بيىل 5 - ماۋسىم كۇنى سوت ۇكىمىمەن 16 جاستاعى شەرزات پولاتتىڭ ولىمىنە قاتىستى 9 ادام 23 جىلدان 1,5 جىلعا دەيىن سوتتالدى.

اتاپ ايتقاندا:

- ابزال شىناسىل 23 جىلعا؛

- راۆيل ساكيەۆ 20 جىلعا؛

- ازامات توقتاۋبايەۆ 15 جىلعا؛

- نۇرقياس ءىلياسوۆ 9 جىلعا؛

- شىڭعىس بەلعوجايەۆ، دارحان اسكەنتاي، نۇربول توقتاۋبايەۆ، ديدار قالياحمەت - ءارقايسىسى 7 جىلعا؛

- دۋمان ىسقاق 1 جىل 6 ايعا سوتتالدى.

دۋمان ىسقاق شىلدە ايىندا جازاسىن وتەۋىنە بايلانىستى بوستاندىققا شىققان بولاتىن.

اپەللياتسيالىق سوت قالعان 8 ايىپتالۋشىنىڭ ءوتىنىشىن قاناعاتتاندىرماي، العاشقى ۇكىمدى وزگەرىسسىز قالدىردى. سوت وتىرىسىنا سوتتالعاندار قاتىسقان جوق.

ءىستىڭ ءمان-جايى

ەسكە سالايىق، بىلتىر 4 - قازان كۇنى توبەلەستەن 16 جاستاعى شەرزات پولات كوز جۇمدى.

2024 -جىلدىڭ 12-قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

2024 -جىلدىڭ جەلتوقسان ايىندا تالعار ماڭىندا شەرزات پولاتتىڭ اعاسىنىڭ دەنەسى تابىلدى.

بيىل 17-ماۋسىم كۇنى نۇرقانات عايىپبايەۆتىڭ ولىمىنە قاتىستى تەرگەۋ توقتاتىلدى.

سونداي-اق پروكۋراتۋرا شەرزات ىسىندەگى كۋاگەر قىزدارعا قاتىستى تەرگەۋ نەلىكتەن قايتادان باستالماعانىن ءتۇسىندىردى.

ودان بولەك شەرزات اكەسىنىڭ ءۇيى ورتەنۋىنە بايلانىستى تەرگەۋ ازىرگە توقتاپ تۇرعانى حابارلاندى.