شەرزات ءىسى: ادۆوكات جۇمات ابەنوۆ سۋدياعا قارسى شاعىم ءتۇسىردى

تالدىقورعان. KAZINFORM - شەرزات پولاتتىڭ ولىمىنە قاتىستى سوت وتىرىسىندا ءۇزىلىس جاريالاندى، دەپ حابارلادى ق ر جوعارعى سوتىنىڭ باسپا ءسوز قىزمەتى

كۇننىڭ ءبىرىنشى جارتىسىندا سوتتالۋشى ابزال شىناسىلدىڭ قورعاۋشىسى جۇمات ابەنوۆ ءتوراعالىق ەتۋشى سۋديا ەرجان جانۇزاقوۆقا قارسى شاعىم ءتۇسىردى.

سوعان بايلانىستى قىلمىستىق-پروتسەستىك كودەكسى 87-بابىنىڭ 11-بولىگىنە سايكەس ءىستى جالعىز قارايتىن سۋدياعا قارسى شاعىمدى سوت ءتوراعاسى نەمەسە سوتتىڭ باسقا سۋدياسى شەشەدى.

زاڭنىڭ وسى نورماسىن نەگىزگە الا وتىرىپ، شاعىمدى سول سوتتىڭ سۋدياسى ا. ا. بەيمبەتوۆ قارايدى.

ەسكە سالايىق، پروكۋرور سوتتالۋشىلاردىڭ ءارقايسىسىنا ق ر قىلمىستىق كودەكستىڭ قاي باپتارى بويىنشا ايىپ تاعىلعانىن اتاپ ءوتتى.

- ابزال شىناسىل قىلمىستىق كودەكستىڭ 293-بابى 3-بولىگى (بۇزاقىلىق)، 99-باپ 2-بولىگى 1،4،7، 9،14-تارماقتارى (ادام ءولتىرۋ)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)؛

- راۆيل ساكيەۆ قىلمىستىق كودەكستىڭ 293-بابى 3-بولىگى (بۇزاقىلىق)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)، 99-باپ 2-بولىگى 7,9-تارماقتارى (ادام ءولتىرۋ)؛

- شىڭعىس بەلعوجايەۆ، نۇرقياس ءىلياسوۆ، دارحان اسكەنتاي، نۇربول توقتاۋبايەۆ، ديدار قالياحمەت، ازامات توقتاۋبايەۆ قىلمىستىق كودەكستىڭ 293-بابى 3-بولىگى (بۇزاقىلىق).

- كامەلەتكە تولماعان ديدار ىسقاق قىلمىستىق كودەكستىڭ 434-بابى (قىلمىس تۋرالى حابارلاماۋ) بويىنشا ايىپ تاعىلىپ وتىر.

ايتا كەتەيىك، وقيعا بويىنشا مەملەكەتتىك ساراپتاما قورتىندىسى جاريالانعانىن جازعانبىز.

سونداي-اق، شەرزات سوتىندا ايىپتالۋشىلار مەن جابىرلەنۋشىلەردى بەتتەستىرۋ ءساتى كورسەتىلگەن بولاتىن.