شەرزات ءىسى: ابزال شىناسىل كىمدى پىشاقتاعانىن ايتتى

تالدىقورعان. KAZINFORM - جەتىسۋ وبلىسىنىڭ مامانداندىرىلعان اۋدانارالىق سوتىندا قارالىپ جاتقان شەرزات پولاتتىڭ ولىمىنە قاتىستى قىلمىستىق ءىس بويىنشا باستى سوتتالۋشى ابزال شىناسىل جاۋاپ بەردى.

سوت وتىرىسىندا ابزال تاعىلعان ايىپتى جارتىلاي مويىندايتىنىن جەتكىزدى.

- دوسىم نۇرقياستان «ەيفوريا» مەيرامحاناسىندا ەكەنىن ءبىلدىم، 15-20 مينۋتتا مەن دە سول جەرگە جەتتىم. كەيىنىرەك ەكى قىز كەلدى، ارتىنان ازامات پەن شىڭعىس، ودان سوڭ دۋمان مەن نۇربول قوسىلدى. ءبىر كەزدە نۇربول بىرەۋدىڭ دوسىن ۇرىپ كەتكەنىن ايتتى، ءبىراق ءبىز وعان ءمان بەرمەي، بي الاڭىنا بەتتەدىك. كەيىن مەيرامحانا جابىلار ۋاقىتتا ازامات پەن شىڭعىستىڭ جوق ەكەنىن بايقادىم. ازامات ماعان حابارلاسىپ، «نۇربول دوسىمەن بىرگە مەندەلەيەۆ كوشەسىندەگى دۇكەننىڭ جانىندا بىرەۋلەرمەن توبەلەسىپ قالدى» دەدى، - دەدى ول.

ابزالدىڭ ايتۋىنشا، سول ءتۇنى جاستار ستاديونىنا جولشىباي بارا جاتقاندا توبەلەس بولىپ جاتقانى جايلى اقپارات العان.

وقيعا ورنىنا جەتكەندە نۇرقانات عايىپبايەۆتىڭ قولىنان مىلتىق كورگەن.

- نۇرقانات اسپانعا وق اتتى، كەيىن قارۋدى بىزگە قاراي كەزەدى. مەن «اتپا، سويلەسەيىك» دەدىم، ول بولسا بوقتاپ، «اتام» دەدى. ول مەنى اتا جازدادى، وق سول قۇلاعىمنىڭ جانىنان ءوتتى. كەيىن ءبىر بالا قارۋدى تارتىپ الماق بولدى، ءبىراق نۇرقانات ونى شالىپ قۇلاتتى. سول كەزدە مەن ارت جاعىنان جاقىنداپ، ونى ۇرۋعا تىرىستىم. سول ساتتە جانىنداعى شەرزات قۇلاپ ءتۇستى. نەدەن قۇلاعانىن بىلمەيمىن، شالىنىپ قالدى دەپ ويلادىم، - دەدى شىناسىل.

ابزالدىڭ ايتۋىنشا، وسىدان كەيىن ول نۇرقاناتتى پىشاقتاعان.

ەسكە سالا كەتەيىك، شەرزات پولاتتىڭ ولىمىنە قاتىستى بۇگىنگى سوتتا تاعى ءبىر سوتتالۋشى ايىپتاۋ اكتىسىمەن كەلىسپەيتىنىن ايتقان.

تاعى ءبىر سوتتالۋشى نۇرقياس ءىلياسوۆ مىلتىقپەن ۇرۋ سەبەبىن تۇسىندىرسە، ازامات توقتاۋبايەۆ وتىرىك ايعاق بەرگەنىن راستادى.