شەرزات بولاتتىڭ ءولىمى: الماتى وبلىسىندا بىرنەشە پوليتسيا قىزمەتكەرى لاۋازىمىنان بوساتىلدى

قونايەۆ. KAZINFORM - تالعاردا كىسى قولىنان قازا تاپقان 16 جاسار شەرزات بولاتتىڭ ءىسى بويىنشا الماتى وبلىسىنىڭ بىرنەشە جوعارى لاۋازىمدى پوليتسيا قىزمەتكەرى وتستاۆكاعا كەتتى.

ىشكى ىستەر ءمينيسترى ەرجان سادەنوۆ الماتى وبلىسى پوليتسيا دەپارتامەنتىنىڭ باسشى قۇرامىمەن وسى جىلدىڭ توعىز ايىنداعى جەدەل قىزمەتتىڭ قورىتىندىسى بويىنشا جيىن وتكىزدى.

سونىمەن قاتار، ق ر ىشكى ىستەر مينيسترلىگى باسشىسىنىڭ بۇيرىعىمەن ءبىرقاتار جوعارى لاۋازىمدى پوليتسەي قىزمەتىنەن بوساتىلدى:

الماتى وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى سەرىك شالقاروۆ؛

تالعار اۋداندىق پوليتسيا ءبولىمىنىڭ باستىعى نۇرجان كۇنتۇنوۆ؛

پوليتسيا دەپارتامەنتىنىڭ الماتى وبلىسى بويىنشا ەكسترەميزمگە قارسى كۇرەس باسقارماسىنىڭ باسشىسى ۇلان بايتاقوۆ؛

الماتى وبلىستىق پوليتسيا دەپارتامەنتى كريمينالدىق پوليتسيا باسقارماسىنىڭ باستىعى رۋسلان سماعۇلوۆ؛

الماتى وبلىستىق پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ باستىعى دۋلات قايىر؛

الماتى وبلىستىق پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسى باستىعىنىڭ ورىنباسارى جانات وماروۆ.

جەدەل كەڭەستىڭ قورىتىندىسى بويىنشا مينيستر وڭىردەگى قۇقىقتىق ءتارتىپتى جانە قوعامدىق قاۋىپسىزدىكتى قامتاماسىز ەتۋ جونىندە ناقتى تاپسىرمالار بەردى.

ءى ءى م باسشىسى تالعار اۋدانىندا كامەلەتكە تولماعان بالانى ءولتىرۋ فاكتىسى بويىنشا تەرگەۋ جۇرگىزىپ جاتقان جەدەل-تەرگەۋ توبىن جەكە تىڭدادى. بۇل بويىنشا ناقتى تاپسىرمالار بەرىلدى.

ەسكە سالايىق، 4-قازاندا تالعار قالاسىنداعى توبەلەستەن ءبىر ادام قايتىس بولعانىن جازعانبىز.

اشۋلى تالعارلىقتار جاس ءوسپىرىم ولىمىنە بايلانىستى نارازىلىققا شىقتى.

الماتى وبلىسىنىڭ پروكۋراتۋراسى كىسى ءولتىرۋ تۋرالى بۇل ءىس ەرەكشە باقىلاۋعا الىنعانىن رەسمي تۇردە حابارلادى.

ىشكى ىستەر ءمينيسترى ەرجان سادەنوۆ الماتى وبلىسى تالعار اۋدانىنداعى جاس ءوسپىرىمنىڭ ولىمىنە قاتىستى ءىستى جەكە باقىلاۋىنا الدى.