الماتىعا ۇشىپ كەلگەن سپورتشىلاردىڭ قاتارىندا مارافوندىق سپورتتىق جۇرىستەن سىنعا تۇسكەن جەڭىل اتلەت ياسمينا توقسانبايەۆا دا بار.
ەسكە سالايىق، وتانداسىمىز ايچي-ناگويا قالاسىندا وتكەن ازيا ويىندارىنىڭ جەڭىمپازى اتانعان بولاتىن. ول جەڭىل اتلەتيكادان ايەلدەر اراسىندا سپورتتىق جۇرىستەن مارافون قاشىقتىعىن 3 ساعات 22 مينۋت 20 سەكۋندا باعىندىرىپ، مارەگە ءبىرىنشى بولىپ جەتتى.
الايدا كەيىن ونىڭ مارافوندىق سپورتتىق جۇرىستەن كورسەتكەن ناتيجەسى جويىلدى. وعان سپورتشىنىڭ اياق كيىمى جارىستا بەكىتىلگەن تىزىمگە سايكەس كەلمەۋى سەبەپ بولدى.
كەيىن قازاقستاننىڭ جەڭىل اتلەتيكا فەدەراتسياسى توقسانبايەۆا ناتيجەسى جويىلعانىمەن، وعان جەڭىس ءۇشىن وتەماقى تولىقتاي تولەنەتىنىن حابارلادى.
اۋەجايدا سپورتشى بۇل جاعدايعا بايلانىستى پىكىر ءبىلدىردى.
- تۋريزم جانە سپورت مينيسترلىگىنەن باستاپ جەڭىل اتلەتيكا فەدەراتسياسىنا دەيىن وسى ءبىر قيىن ساتتە ماعان قولداۋ كورسەتىپ جاتىر. الدا بۇكىل سپورتتىق ءومىرىم تۇر. كەلەسى جىلى الەم چەمپيوناتىنىڭ مەدالى ءۇشىن كۇرەسەمىن. بۇل مەنىڭ العاشقى ازيادام بولدى، - دەدى ول.
سپورتشى اياق كيىمىنە قاتىستى سۇراقتارعا پىكىر بىلدىرمەدى. الايدا جارىستاعى ناتيجەسىنىڭ قايتا قارالۋى تۋرالى سۇراققا جاۋاپ بەردى.
- مەن ۇمىتتەنىپ جۇرگەن جوقپىن، ءبىراق بىلەتىنىم: ءبارى دە قولدان كەلگەننىڭ ءبارىن جاساپ جاتىر، - دەدى ول.
سونىمەن قاتار ياسمينا توقسانبايەۆا التىن جۇلدەسىنىڭ ناتيجەسى جويىلعاندا قانداي سەزىمدە بولعانىن ءتۇسىندىرىپ، وزىنە قولداۋ بىلدىرگەن جاندارعا العىسىن ايتتى.
- وسى جاعدايدى ەستىگەندە بولمەدە جاتقان ەدىم. دەنەم تىرىسىپ، قاتتى كۇيزەلىستە بولدىم. قاسىمدا دارىگەر وتىردى. ىشتەي «ءبارى مەنەن تەرىس اينالادى، حەيت بولادى» دەگەن ويلار كەلدى. ءبىراق ءبارى كەرىسىنشە بولدى: تەك قازاقستاننان عانا ەمەس، مەكسيكادان، قىتايدان دا ماعان ادامدار قولداۋ ءبىلدىرىپ جاتىر، - دەدى سپورتشى.
ب ا ق وكىلدەرى سپورتشىدان جارىستاعى ناتيجەسىنە بايلانىستى وتەماقى العانىن نە الماعانىن سۇرادى.
- مەن بارلىق اقشانى التىن مەدال مەن ەلىمنىڭ ءانۇرانىن ورىنداۋعا ايىرباستايتىن ەدىم، - دەپ جاۋاپ بەردى ول.
ەسكە سالايىق، ازيا ويىندارىنىڭ جۇلدەگەرلەرى الماتىعا ورالدى.