شۇكىر ەتۋ مەن ريزاشىلىق قوعامداعى تەرىس ۇستانىمداردى جۇمسارتا الادى - زەرتتەۋ

پولشادا جۇرگىزىلگەن زەرتتەۋگە سايكەس، سانالى ريزاشىلىق نەمەسە شۇكىر ەتۋ ادامداردىڭ بۇرىن قالىپتاسقان تەرىس كوزقاراستارىن (انتيسەميتيزم، سەكسيزم، انتيمميگرانتتىق كوزقاراستار) 6 اپتادا ايتارلىقتاي تومەندەگەن.

بۇل وزگەرىس اسىرەسە ۇجىمدىق نارتسيسسيزم دەڭگەيى جوعارى ادامدار اراسىندا بايقالعان. ءبىراق تەك 10 مينۋتتىق ءبىر رەتتىك سەانس مۇنداي اسەر كورسەتپەگەن. زەرتتەۋ ناتيجەلەرى Psychological Science جۋرنالىندا جاريالاندى.

ۇجىمدىق نارسيسسيزم دەگەنىمىز - نارسيسسيزمنىڭ ەرەكشە ءتۇرى، وندا ادامدار ءوز الەۋمەتتىك توبىنىڭ (ۇلتى، ەتنوسى، ءدىنى نەمەسە باسقا ورتاق يدەنتيفيكاتسياسى بويىنشا) ارتىقشىلىعى مەن ەرەكشە ماڭىزدىلىعىنا قاتتى سەنەدى. سونىمەن بىرگە ولار ءوز توبىنىڭ ۇلىلىعى باسقالار تاراپىنان جەتكىلىكتى تۇردە مويىندالمايدى دەپ سانايدى. بۇل گيپەرسەزىمتالدىق توپقا قارسى سىن نەمەسە قاۋىپ رەتىندە قابىلداناتىن جاعدايلارعا انتاگونيستىك مىنەز-قۇلىقتى تۋدىرادى.

زەرتتەۋدى باستاعان پروفەسسور اگنەشكا گولەتس دە زاۆالا وسوزداندى ريزاشىلىق پراكتيكاسى ۇجىمدىق نارسيسستەر اراسىندا الدىن الا تەرىس كوزقاراستاردى ازايتا الا ما دەگەن سۇراققا جاۋاپ ىزدەدى. پراكتيكا ادامنىڭ ومىرىندەگى وڭ اسپەكتىلەرگە نازار اۋدارۋدى جانە ولاردى باعالاۋدى قامتيدى، بۇل ەموتسيونالدىق تۇراقتىلىقتى ارتتىرىپ، قاناعاتتانۋ سەزىمىن كۇشەيتەدى.

العاشقى زەرتتەۋ پيلوتتىق سيپاتتا بولدى. 569 پولياك (18-76 جاس ارالىعىنداعى) قاتىسۋشى ءۇش توپقا ءبولىندى: ريزاشىلىق پراكتيكاسى، وسوزداندى زەيىن (mindful attention) پراكتيكاسى جانە باقىلاۋ توبى. زەرتتەۋ ناتيجەسىندە التى اپتالىق ريزاشىلىق پراكتيكاسى قاتىسۋشىلاردىڭ الدىن الا كوزقاراستارىن ايتارلىقتاي ازايتقانى انىقتالدى. سونىمەن قاتار، بۇل تاجىريبە ۇجىمدىق نارسيسسيزم مەن تەرىس كوزقاراستار اراسىنداعى بايلانىستى السىرەتكەنى بايقالدى.

عالىمداردىڭ ايتۋىنشا بۇرىن قالىپتاسقان ۇستانىمدار وڭايلىقپەن جويىلمايدى، كەرىسىنشە، كۇشەيۋى مۇمكىن. ءبىراق ءبىز ولاردى ازايتۋدىڭ ءتيىمدى جولىن تاپتىق - ريزاشىلىق پراكتيكاسى. ەكى زەرتتەۋدىڭ ناتيجەسىندە بۇل تاجىريبە ۇجىمدىق نارسيسستەر اراسىنداعى انتيسەميتيزم، سەكسيزم، گوموفوبيا جانە انتييمميگرانتتىق كوزقاراستاردى تومەندەتكەن.

دەگەنمەن، زەرتتەۋگە تەك ەرىكتى تۇردە قاتىسقان ادامدار عانا تارتىلعانىن ەسكەرۋ قاجەت. الىنعان ناتيجەلەردى وسىنداي تاجىريبەلەرگە قىزىعۋشىلىعى از ادامدار اراسىندا قايتالاي الامىز با دەگەن سۇراق ءالى اشىق كۇيدە قالىپ وتىر.