شەكاراداعى ۇزىنسونار كەزەك: انتيكور كوشپەلى مونيتورينگ وتكىزدى

اقتوبە. KAZINFORM - اقتوبە وبلىسىنداعى «جايساڭ» شەكارا بەكەتىندە ءالى دە ۇزىنسونار كەزەك. سىبايلاس جەمقورلىققا قارسى قىزمەتتىڭ اقتوبە وبلىسى بويىنشا دەپارتامەنتى كوشپەلى مونيتورينگ وتكىزدى.

سىبايلاس جەمقورلىققا قارسى قىزمەتتىڭ اقتوبە وبلىسى بويىنشا دەپارتامەنت باسشىسى تالعات باشيەۆ مارتوك اۋدانىنداعى «جايساڭ» وتكىزۋ پۋنكتىنە باردى. كوشپەلى مونيتورينگكە اكىمدىك، كولىك پروكۋراتۋراسى، مەملەكەتتىك كىرىستەر ورگاندارى، ۇقكد شەكارا قىزمەتى جانە ىشكى ىستەر ورگاندارىنىڭ وكىلدەرى قاتىستى.

سىبايلاس جەمقورلىققا قارسى قىزمەتتىڭ وبلىس بويىنشا دەپارتامەنت باسشىسى تالعات باشيەۆ ازاماتتار مەن بيزنەس وكىلدەرىنىڭ، ونىڭ ىشىندە شەتەل ازاماتتارىنىڭ مۇددەسىنە تىكەلەي اسەر ەتەتىن جاعدايدى شۇعىل شەشۋدى ۇسىندى. بىرىنشىدەن، جول جوندەۋ جۇمىستارى اياقتالىپ، وتكىزۋ پۋنكتىنىڭ ينفراقۇرىلىمى جاڭارتىلعانعا دەيىن ەلەكتروندى كەزەك جۇيەسىن ۋاقىتشا توقتاتا تۇرۋ مۇمكىندىگىن قاراستىرۋ قاجەت. ونىڭ ورنىنا برونداۋدىڭ يكەمدى تەتىگىن ەنگىزۋ جانە ەلەكتروندى كەزەك جۇيەسىنىڭ جۇمىس ىستەۋ ءتارتىبىن جەتىلدىرۋ كەرەك. ەكىنشىدەن، وتكىزۋ بەكەتىنىڭ سانيتارلىق جاعدايلارىن رەتتەپ، اقپاراتتىق تاقتالار جانە باسقا دا قاجەتتى ەلەمەنتتەردى ىسكە قوسۋ ۇسىنىلدى. ۇشىنشىدەن، وبلىستىق پوليتسيا دەپارتامەنتىنە قوسىمشا كۇشتەردى تارتۋ ارقىلى «جايساڭ» وتكىزۋ بەكەتىندە قۇقىقتىق ءتارتىپتى قامتاماسىز ەتۋ ۇسىنىلدى، - دەپ حابارلادى سىبايلاس جەمقورلىققا قارسى قىزمەتتىڭ اقتوبە وبلىسى بويىنشا دەپارتامەنتتىڭ باسپا ءسوز قىزمەتى.

ەسكە سالساق، وبلىستىق كاسىپكەرلەر پالاتاسىنا ءبىر اپتادا 200 دەن استام شاعىم تۇسكەن. شەكارادان وتەتىن جۇرگىزۋشىلەردىڭ ماسەلەسىن شەشۋ ءۇشىن جيىن ءوتتى.