شەكارادا تاعى دا ۇزىن سونار كەزەك: پوليتسيا باقىلاۋدى كۇشەيتتى

اقتوبە. KAZINFORM - «جايساڭ» شەكارا بەكەتىندە 50 جەڭىل، 100 دەن استام جۇك كولىگى تۇر. پوليتسيا قازىر كولىكتەردىڭ ءجۇرىسىن باقىلاپ، قۇقىقتىق كەڭەس بەرىپ جاتىر.

قازاقستان-رەسەي شەكاراسىنداعى بەكەتتە تاعى دا كەزەك كوبەيدى. ماۋسىمدا باستالعان جاعداي ءالى رەتكە كەلمەدى. شىلدە ايىنىڭ العاشقى كۇنى دە كەزەك تولاستامادى.

- «جايساڭ» وتكىزۋ پۋنكتىندە 100 دەن استام جۇك كولىگىنىڭ جينالعانى بايقالادى. اتالعان جاعدايدىڭ تۋىنداۋىنا وسى ۋچاسكەدە ەنگىزىلگەن جاڭا تالاپتار سەبەپ بولدى. قوعامدىق ءتارتىپ پەن جول قوزعالىسى قاۋىپسىزدىگىن قامتاماسىز ەتۋ ماقساتىندا پوليتسيا قىزمەتكەرلەرى تاۋلىك بويى كەزەكشىلىك اتقارىپ جاتىر. ولار قوعامدىق ءتارتىپتى ساقتاۋ، كولىك اعىنىن رەتتەۋ جۇمىستارىن جۇرگىزىپ، شەكارادان ءوتۋ ەرەجەلەرىنە قاتىستى قۇقىقتىق كەڭەس تە بەرەدى. جۇرگىزۋشىلەردەن سابىر ساقتاۋدى، بەلگىلەنگەن ءتارتىپ پەن پوليتسيا قىزمەتكەرلەرىنىڭ نۇسقاۋلارىن قاتاڭ ساقتاۋدى سۇرايمىز. اتالعان ۋاقىت ارالىعىندا قوعامدىق ءتارتىپتى بۇزۋ فاكتىلەرى تىركەلگەن جوق، - دەدى مارتوك اۋداندىق پ د باستىعى نۇرلان تاۋشانبايەۆ.

ەسكە سالساق، مامىر ايىنىڭ سوڭىندا وبلىستىق كاسىپكەرلەر پالاتاسىنا ءبىر اپتادا 200 دەن استام شاعىم تۇسكەن. شەكارادان وتەتىن جۇرگىزۋشىلەردىڭ ماسەلەسىن شەشۋ ءۇشىن جيىن ءوتتى. سىبايلاس جەمقورلىققا قارسى قىزمەتتىڭ اقتوبە وبلىسى بويىنشا دەپارتامەنتى كوشپەلى مونيتورينگ وتكىزدى. ال اقتوبە وبلىستىق مەملەكەتتىك كىرىستەر دەپارتامەنتى «جايساڭ» شەكارا بەكەتىندەگى جول قۇرىلىسى ۋاقىتشا توقتاتىلىپ، جۇرگىزۋشىلەر ەلەكتروندى تالون الۋعا ماشىقتانعانىن ايتتى. ارادا ءبىر اي وتكەنىمەن جاعداي وزگەرمەي تۇر.