بەينەجازبادا قازاقستان مەن وزبەكستان شەكاراسىنداعى «باۋىرجان قونىسبايەۆ» وتكىزۋ بەكەتىندە 40 شاقىرىمعا سوزىلعان جۇك كولىكتەرىنىڭ ۇزىن-سونار كەزەگى بايقالادى.
وسىعان بايلانىستى تۇركىستان وبلىسى بويىنشا مەملەكەتتىك كىرىستەر دەپارتامەنتى تۇسىنىكتەمە بەردى.
كەدەندىك اكىمشىلەندىرۋ باسقارماسىنىڭ باسشىسى سەرىك ماليكوۆتىڭ ايتۋىنشا، جىل باسىنان بەرى شەكاراداعى جۇك كولىكتەرىنىڭ اعىنى تۇراقتى تۇردە ءوسىپ كەلەدى. قاڭتاردان شىلدەگە دەيىن جۇك كولىكتەرىنىڭ سانى 51 پايىزعا ارتقان.
- بيىل قاڭتار ايىندا قازاق-وزبەك شەكاراسىندا وتكىزۋ پۋنكتتەرى ارقىلى 25004 جۇك كولىگى، اقپاندا – 22843، ناۋرىزدا – 26121، ساۋىردە – 28533، سونداي-اق مامىردا – 30144، ماۋسىمدا - 34735، شىلدەدە - 37718 جۇك كولىگى ءوتتى، - دەدى سەرىك ماليكوۆ.
ونىڭ مالىمەتىنشە، تۇركىستان وبلىسىنىڭ اۋماعىندا جۇك كولىكتەرىن وتكىزەتىن ءۇش وتكىزۋ پۋنكتى بار. قازىرگى ۋاقىتتا «باۋىرجان قونىسبايەۆ» بەكەتى ەكسپورت باعىتىندا تاۋلىگىنە ورتا ەسەپپەن 600-650 جۇك كولىگىن وتكىزەدى.
- بەكەتتىڭ ينفراقۇرىلىمدىق وتكىزۋ قابىلەتى تاۋلىگىنە 500 كولىككە دەيىن ەسەپتەلگەن. سوعان قاراماستان وتكىزۋ قارقىنى كەي كۇندەرى تاۋلىگىنە 700 جۇك كولىگىنە دەيىن جەتەدى. كەزەكتە تۇرعان كولىكتەردىڭ بارلىعى ادەتتە ءبىر تاۋلىك ىشىندە وتكىزىلەدى، - دەدى ول.
سونداي-اق سەرىك ماليكوۆ قىتاي شەكاراسىنداعى جاعدايمەن سالىستىرعاندا مۇنداعى كەزەكتىڭ ۇزاقتىعى ايتارلىقتاي از ەكەنىن اتاپ ءوتتى. ونىڭ ايتۋىنشا، قىتاي شەكاراسىندا جۇك كولىكتەرى كەيدە ءبىر ايعا دەيىن كەزەكتە تۇرادى. ءتىپتى الداعى 15-قىركۇيەككە الدىن الا كەزەككە جازىلعان جۇرگىزۋشىلەر بار. بۇل رەتتە قىتايمەن شەكاراداعى وتكىزۋ پۋنكتتەرىنىڭ ماڭىندا جۇك كولىكتەرىنە ارنالعان تۇراق ورىندارى قاراستىرىلعان.
ونىڭ سوزىنشە، اۆتوتۇراق ماسەلەسى وڭىردەگى كەيبىر وتكىزۋ پۋنكتتەرىندە وزەكتى بولىپ وتىر. سالدارىنان جۇرگىزۋشىلەر كولىكتەرىن جول جيەگىنە قويۋعا ءماجبۇر. وسى ماسەلەنى شەشۋ ماقساتىندا «باۋىرجان قونىسبايەۆ» وتكىزۋ پۋنكتىنىڭ ماڭىندا اۆتوتۇراق سالۋ قولعا الىنعان.
كەلەس اۋدانى اكىمدىگىنىڭ مالىمەتىنشە، اۋدان اۋماعى ارقىلى تاۋلىگىنە 30 مىڭ ترانزيتتىك كولىك وتەدى. قازىر «باۋىرجان قونىسبايەۆ» كەدەن بەكەتىنىڭ ماڭىندا كولىك-لوگيستيكا سالاسىن دامىتۋعا باعىتتالعان «Global Food Logistics» ج ش س- ءنىڭ ينۆەستيتسيالىق جوباسى جۇزەگە اسىپ جاتىر.
- جوبا اۆتوتۇراق ماسەلەسىن تولىق شەشپەگەنىمەن، جۇك كولىكتەرى ءۇشىن تۇراق ورىندارىن كوبەيتۋگە جانە كولىك قوزعالىسىن رەتتەۋگە مۇمكىندىك بەرەدى. جەكە ينۆەستيتسيا ەسەبىنەن ىسكە اسىرىلاتىن نىساننىڭ قۇنى - 3,7 ميلليارد تەڭگە. جالپى اۋماعى - 10 گەكتار. لوگيستيكالىق كەشەن 1000 جۇك كولىگىنە ارنالعان. قۇرىلىس جۇمىستارىن بيىل باستاپ، جىل سوڭىنا دەيىن اياقتاۋ جوسپارلانىپ وتىر. نىسان ىسكە قوسىلعاننان كەيىن 30 جاڭا جۇمىس ورنى اشىلادى، - دەلىنگەن اۋدان اكىمدىگىنىڭ Kazinform اگەنتتىگىنە بەرگەن جاۋابىندا.
بۇعان دەيىن تۇركىستان وبلىسىنداعى «قاپلانبەك» وتكىزۋ بەكەتىندە جانجال تۋىپ، پوليتسيا ءىس قوزعاعانىن جازعان ەدىك.
15:28, 17 تامىز 2026
شەكاراداعى 40 شاقىرىمدىق كەزەك: جۇك كولىكتەرى نەگە كەپتەلىپ قالدى
تۇركىستان. KAZINFORM - تۇركىستان وبلىسىنداعى «باۋىرجان قونىسبايەۆ» كەدەن بەكەتىنىڭ ماڭىندا جۇك كولىكتەرىنىڭ 40 شاقىرىمعا جۋىق كەزەگى تۋرالى ۆيدەو الەۋمەتتىك جەلىلەردە تارادى.