شەكارا ماڭىنداعى اۋىلداردا حالىق سانى كەمىپ بارادى
استانا. قازاقپارات - ەلدە ءسابي كوبەيگەنىمەن، شالعاي اۋىلداردا بالا سانى ازايدى، دەپ حابارلايدى 24KZ.
كەيىنگى ءۇش جىلدا باتىس قازاقستان وبلىسىندا 12 ءبىلىم ورداسى جابىلدى. بيىل تاعى 1 مەكتەپ جۇمىسىن توقتاتىپ، 6 ورتا مەكتەپتىڭ نەگىزگىگە، 6 نەگىزگى مەكتەپتىڭ باستاۋىشقا اينالۋ قاۋپى بار.
بۇل جاعداي شەكارا ماڭىنداعى ەلدى مەكەندەرگە قيىن. ويتكەنى مەكتەپتەر جابىلسا، حالىق جاپپاي كوشۋى ىقتيمال. ماسەلەن، جانىبەك اۋدانى تالوۆ اۋىلىنداعى 650 وقۋشىعا ارنالعان مەكتەپتە قازىر نەبارى 57 بالا ءبىلىم الىپ ءجۇر. عابيت سارىبايەۆ اتىنداعى ورتا مەكتەپتە 11-سىنىپ ەكەۋ. ءبىرى ورىسشا، ءبىرى قازاق ءتىلدى. ەكەۋىندە دە ەكى وقۋشىدان قالعان. «مەكتەپتەگى ەڭ تىنىش كلاسس بىزدەر، ويتكەنى شۋلايتىن ەشكىم جوق»، - دەپ ازىلدەيدى 11 «ا» سىنىبىنىڭ شاكىرتتەرى جانەل مەن ۇلجان.
ۇلجان ايتاليەۆا، 11-سىنىپ وقۋشىسى:
- ەكەۋمىز كوپ ۇندەمەيمىز، تەك ساباق وقي بەرەمىز. دەنە ساباعىندا ەكى وقۋشى بولعان سوڭ قىزىقسىز بولادى. جاڭا جىلدا قاتىسقاندا دا تەك ەكەۋىمىز. ءبىر جاعىنان ارتىقشىلىعى سول، بيلەيتىن دە، قاتىساتىن دا ەكەۋىمىز بولعاسىن قيىنداۋ.
تالوۆ اۋىلىندا 1981 -جىلى 3 قاباتتى مەكتەپ سالىنعاندا 650 وقۋشى وقىپتى. 90 -جىلداردىڭ ورتاسىنان باستاپ بالا سانى بىرتىندەپ كەمي باستاعان. وسىدان 5 جىل بۇرىن 180 شاكىرت بولسا، قازىر 57 بالا قالىپتى. الداعى جاڭا وقۋ جىلىندا ودان دا ازايادى. ويتكەنى بيىل ءبىرىنشى سىنىپقا باراتىن بالدىرعان جوق. ال نورماتيۆ بويىنشا ورتا مەكتەپتە 81 بالادان كەم بولماۋى ءتيىس.
تالوۆ اۋىلى اۋدان ورتالىعى جانىبەكتەن 130 شاقىرىم قاشىقتىقتا ورنالاسقان. سونىڭ 40 شاقىرىمىنا بۇرىن اسفالت توسەلسە، بيىل اۋىلدان باستاپ 36 شاقىرىمعا جول سالىنىپ جاتىر.
اسقار سارسەنعاليەۆ، تالوۆ اۋىلدىق وكرۋگىنىڭ اكىمى:
- 2-3 مىڭعا جۋىقتاعان حالىق بولعان. كۇنى بۇگىن 680 ادامدى قۇراپ وتىر. بۇل دەگەنىڭ 177 اۋلا. حالىقتىڭ كوشۋى جۇمىسسىزدىق تا بار. ەكىنشى ۇلكەن ماسەلەسى كيىك ماسەلەسى بولىپ وتىر. تالوۆ اۋىلى بويىنشا 33 شارۋا قوجالىعى بار اتا كاسىپ مال شارۋاشىلىعىمەن اينالىساتىن. وسى بارشا قوجالىقتارعا مال ازىعىن دايىنداۋ ۇلكەن قيىندىقتار تۋدىرىپ وتىر. 2024 -جىلى 14 وتباسى كوشىپ كەتتى. بيىل دا وسى ماسەلە وزەكتى بولىپ وتىر. كوشەم دەگەن 5-6 وتباسى بار.
اۋىل اكىمى حالىق سانىن كوبەيتۋ ءۇشىن اۋىلدان شەكارا زاستاۆاسىن اشۋدى ۇسىنادى. ءارى «قالادان - اۋىلعا» باعدارلاماسىنىڭ مۇمكىندىكتەرىن پايدالانۋدى، ياعني كوپبالالى وتباسىلاردى كوبىرەك كوشىرۋدى سۇرايدى. جالپى ورال وڭىرىندە 405 اۋىلدىق ەلدى مەكەن بولسا، سونىڭ 105- ءى شەكارا ماڭىندا ورنالاسقان. ول اۋىلداردا 104 مىڭ حالىق ءومىر سۇرەدى.