زاڭ جوباسى 116 تۇزەتۋدەن تۇرادى جانە بايلانىس قىزمەتتەرىنىڭ ساپاسى مەن قولجەتىمدىگىن ارتتىرۋ، تەلەكوممۋنيكاتسيا ينفراقۇرىلىمىن دامىتۋ، بايلانىس جەلىلەرىندەگى الاياقتىقپەن كۇرەسۋ باعىتتارىن قامتيدى.
- ءبىرىنشى بلوكتا الەۋمەتتىك ماڭىزى بار مەملەكەتتىك سەرۆيستەرگە ترافيگى ەسەپتەلمەيتىن، ياعني تاريفسىز قولجەتىمدىلىك ەنگىزۋ قاراستىرىلعان. بۇل ازاماتتارعا بالانس ءنول بولسا دا، نەگىزگى مەملەكەتتىك سەرۆيستەردى پايدالانۋعا مۇمكىندىك بەرەدى. مىسالى، eGov, e-Otinish, Aitu ۇلتتىق مەسسەندجەرى جانە وزگە دە قوسىمشالار. وعان قوسا، توتەنشە جاعدايدا جەدەل ارەكەت ەتۋ ءۇشىن «112» قىزمەتىنە ادامنىڭ ورنالاسقان جەرىن ايقىنداۋ مۇمكىندىگى وتەۋسىز بەرىلمەك،-دەدى پرەمەر-ءمينيستردىڭ ورىنباسارى -جاساندى ينتەللەكت جانە سيفرلىق دامۋ ءمينيسترى جاسلان ماديەۆ جاڭا زاڭ تانىستىرىلىمىندا.
بايلانىس وپەراتورلارى جۇمىسىنىڭ اشىقتىعىن ارتتىرۋ بويىنشا نورمالار كوزدەلگەن. وپەراتورلار قارجىلىق ەسەپتىلىكتى، سونداي-اق ينفراقۇرىلىمعا قول جەتكىزۋ تاريفتەرىن جاريالايتىن بولادى.
بايلانىس ساپاسىن جاقسارتۋ ءۇشىن ۇيالى بايلانىس سيگنالىنىڭ كۇشەيتكىشتەرى - ياعني رەپيتەرلەردى اكەلۋگە شەكتەۋلەر ەنگىزىلەدى. ەندى ولاردى تەك بايلانىس وپەراتورلارى عانا اكەلە الادى. بۇل جەلىگە كەدەرگى كەلتىرەتىن سەرتيفيكاتتالماعان قۇرالداردى شەكتەيدى.
سونداي-اق بايلانىس ينفراقۇرىلىمىن سالۋ ءۇشىن جەر ۋچاسكەلەرىن ءبولۋ ءتارتىبى جەڭىلدەتىلەدى. ەگجەي-تەگجەيلى جوسپارعا نەمەسە باس جوسپارعا مىندەتتى تۇردە ەنگىزبەي-اق جەر بەرۋ تەتىكتەرى وڭتايلاندىرىلادى. ەرەكشە قورعالاتىن تابيعي اۋماقتاردا بايلانىس جەلىلەرىن سالۋ مۇمكىندىگى كوزدەلەدى. بۇل شالعاي، اۋىلدىق جانە تۋريستىك ايماقتاردا ينتەرنەتپەن قامتۋدى كەڭەيتۋگە كومەكتەسەدى.
ەكىنشى بلوك تەلەكوم-ينفراقۇرىلىمدى دامىتۋعا باعىتتالعان. راديوجيىلىك سپەكترىن پايدالانۋعا بەرىلەتىن رۇقساتقا مەرزىم ەنگىزىلەدى. بۇل جيىلىكتەردى ءتيىمدى بولۋگە جانە بوس تۇرىپ قالۋىن بولدىرماۋعا مۇمكىندىك بەرەدى. سونداي-اق، ينتەرنەت جەلىلەرى جانە ينتەرنەتكە سىمسىز تۇراقتى قولجەتىمدىلىك سياقتى جاڭا تەحنولوگيالار ءۇشىن قۇقىقتىق نەگىز قالىپتاسادى.
ۆيرتۋالدى وپەراتورلاردىڭ جۇمىس شارتتارى مەن سپۋتنيكتىك بايلانىس جۇيەلەرىن پايدالانۋ تالاپتارى جاڭارتىلادى. بۇل جاڭا سپۋتنيك جۇيەلەرىن كەڭىرەك ەنگىزۋگە، شالعاي جەرلەردە ينتەرنەتتى جاقسارتۋعا جانە سپۋتنيكتىك بايلانىستا باسەكەنى كۇشەيتۋگە جول اشادى.
- بۇل تۇزەتۋلەردى حالىقارالىق ەلەكتربايلانىس وداعىنىڭ ساراپشىلارى وڭ اتاپ ءوتىپ، قابىلدانىپ جاتقان شارالاردىڭ بىرەگەيلىگى مەن ماڭىزدىلىعىن اتاپ ءوتتى. سونداي-اق حالىقارالىق ترانزيتتىك ينتەرنەت ترافيكتىڭ كەدەرگىسىز ءوتۋى زاڭ جۇزىندە بەكىتىلەدى. بۇل قازاقستاننىڭ وڭىرلىك تسيفرلىق حاب رەتىندەگى رولىن كۇشەيتەدى،-دەدى جاسلان ماديەۆ.
ايتا كەتەيىك، قازاقستاندا پويىزدار مەن ۇشاقتاردا ينتەرنەت قولجەتىمدى بولادى.