مينيسترلىك مالىمەتىنشە، ونىڭ كومەگىمەن جاردەماقى الۋشىلار ءوز وتباسىنىڭ الەۋمەتتىك جاعدايىنا الدىن الا باعا بەرىپ، ەسەپتەۋ كەزىندە قانداي مالىمەتتەر ەسكەرىلەتىنىن ءوز بەتىنشە كورە الادى.
كالكۋلياتور تەك جاردەماقى الۋشىلارعا قولجەتىمدى. سەرۆيس قازاق، ورىس جانە اعىلشىن تىلدەرىندە جۇمىس ىستەيدى. ونى بىرنەشە رەت پايدالانۋعا بولادى. مىسالى، ەنگىزىلگەن مالىمەتتەردى تەكسەرۋ نەمەسە ەسەپتەۋدى قايتا جۇرگىزۋ ءۇشىن.
قوسىمشاعا اۆتوريزاتسيادان وتكەننەن كەيىن كەيبىر مالىمەتتەر مەملەكەتتىك دەرەكقورلاردان اۆتوماتتى تۇردە جۇكتەلەدى. ولاردىڭ قاتارىندا پايدالانۋشىنىڭ جىنىسى مەن جاسى، اتىنا تىركەلگەن جەڭىل جانە كوممەرتسيالىق كولىك قۇرالدارى، اۋىل شارۋاشىلىعى تەحنيكاسى، جىلجىمايتىن مۇلىك، جەر ۋچاسكەلەرى، سونداي-اق كاسىپكەرلىك قىزمەتكە قاتىسۋى تۋرالى اقپارات بار. بۇل دەرەكتەردى قايتا ەنگىزۋدىڭ قاجەتى جوق، تەك ولاردىڭ وزەكتىلىگىن تەكسەرۋ جەتكىلىكتى.
ال قالعان مالىمەتتەردى ازامات ءوزى تولتىرادى. اتاپ ايتقاندا، وزىمەن بىرگە تۇراتىن وتباسى مۇشەلەرى، ولاردىڭ جۇمىسپەن قامتىلۋى، مۇگەدەكتىگى نەمەسە سوزىلمالى اۋرۋلارىنىڭ بولۋى، نەسيەلەرى مەن مۇلكى تۋرالى اقپاراتتى كورسەتۋ قاجەت. تۇرعىن ءۇي، اۆتوكولىكتەر مەن جەر ۋچاسكەلەرى وتباسىنىڭ ءار مۇشەسى بويىنشا جەكە ەنگىزىلەدى. ال وتباسىنىڭ سىياقىلار مەن ۇستەمەاقىلاردى قوسا العانداعى ورتاشا ايلىق تابىسى ءبىر جالپى سومامەن كورسەتىلەدى.
ەسەپتەۋ ناتيجەسى ەنگىزىلگەن مالىمەتتەردىڭ تولىقتىعى مەن دۇرىستىعىنا تىكەلەي بايلانىستى. ەگەر وتباسى مۇشەلەرىنىڭ ءبىرى كورسەتىلمەسە نەمەسە تابىسى مەن مۇلكى تۋرالى اقپارات ەنگىزىلمەسە، الدىن الا باعالاۋ ناقتى جاعدايعا سايكەس كەلمەۋى مۇمكىن. سوندىقتان ەسەپتەۋدى باستاماس بۇرىن وتباسى قۇرامىن جانە ەنگىزىلگەن بارلىق مالىمەتتى مۇقيات تەكسەرۋ ماڭىزدى.
ەگەر كالكۋلياتوردا، مىسالى، ساتىلىپ كەتكەن اۆتوكولىك نەمەسە وزەكتىلىگىن جوعالتقان باسقا مۇلىك كورسەتىلسە، مالىمەتتەردى سەرۆيستىڭ وزىندە تۇزەتۋگە بولادى. الايدا مۇنداي وزگەرىستەر تەك الدىن الا ەسەپتەۋ ءۇشىن پايدالانىلادى جانە مەملەكەتتىك دەرەكقورلارداعى رەسمي اقپاراتقا اسەر ەتپەيدى.
رەسمي مالىمەتتەرگە تۇزەتۋ ەنگىزۋ ءۇشىن eGov.kz پورتالى نەمەسە eGov Mobile قوسىمشاسى ارقىلى ۋاكىلەتتى ورگانعا نە تۇرعىلىقتى جەرى بويىنشا حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ اۋماقتىق دەپارتامەنتىنە جۇگىنۋ قاجەت.
- ماڭىزدى! الەۋمەتتىك جەلىلەردە تارالعان ءال-اۋقاتتى باعالاۋ كالكۋلياتورلارىن پايدالانباۋعا كەڭەس بەرەمىز. ولار رەسمي سەرۆيستەر قاتارىنا جاتپايدى جانە ونداعى اقپارات شىنايى بولماۋى مۇمكىن. دۇرىس ناتيجە الۋ ءۇشىن تەك eGov Mobile قوسىمشاسىنداعى رەسمي «ءال-اۋقات كالكۋلياتورىن» پايدالانىڭىز، - دەلىنگەن مينيسترلىك حابارلاماسىندا.
ەسەپتەۋ اياقتالعاننان كەيىن پايدالانۋشى الدىن الا ناتيجەمەن تانىسىپ، وعان كەلىسەتىنىن نەمەسە كەلىسپەيتىنىن بىلدىرە الادى. سونىمەن قاتار قوسىمشادا كالكۋلياتور جۇمىسىنا بەس بالدىق شكالا بويىنشا باعا بەرىپ، ەركىن فورماتتا پىكىر قالدىرۋ مۇمكىندىگى قاراستىرىلعان. بۇل ازاماتتاردىڭ پىكىرىن ەسكەرىپ، سەرۆيستىڭ ساپاسىن ارتتىرۋعا ىقپال ەتەدى.
وسى تۇستا الدىن الا ەسەپتەۋ مەن جاردەماقى تاعايىنداۋ تۋرالى رەسمي شەشىمنىڭ اراجىگىن اجىراتا ءبىلۋ ماڭىزدى. كالكۋلياتور تەك اقپاراتتىق- انىقتامالىق سيپاتقا يە. وندا كورسەتىلگەن ناتيجە جاردەماقىنىڭ تاعايىندالاتىنىن، مولشەرى وزگەرەتىنىن نەمەسە تولەمنىڭ توقتاتىلاتىنىن بىلدىرمەيدى.
ناتيجەگە كەلىسۋ نەمەسە كەلىسپەۋ، سەرۆيسكە باعا بەرۋ جانە پىكىر قالدىرۋ جاردەماقىنى تاعايىنداۋعا، ونىڭ مولشەرىنە نەمەسە تولەمنىڭ جالعاسۋىنا ەشقانداي اسەر ەتپەيدى. كالكۋلياتوردى پايدالانۋ جاردەماقىدان باس تارتۋ تۋرالى ءوتىنىش بولىپ سانالمايدى جانە تولەمدى توقتاتۋعا نەمەسە ۋاقىتشا توقتاتا تۇرۋعا نەگىز بولا المايدى.
وسىلايشا، كالكۋلياتور وتباسىنىڭ ءال-اۋقاتىنا الدىن الا باعا بەرۋگە، باستاپقى مالىمەتتەردى تەكسەرۋگە جانە قاجەت بولعان جاعدايدا ەسەپتەۋدى قايتا جۇرگىزۋگە مۇمكىندىك بەرەدى. بۇل رەتتە الەۋمەتتىك قولداۋ شارالارىن تاعايىنداۋدىڭ زاڭنامادا بەلگىلەنگەن ءتارتىبى وزگەرىسسىز قالادى.
ايتا كەتەيىك، ەندى وتباسىنىڭ ءال-اۋقات ساناتى اي سايىن قايتا قارالادى. ەگەر ءۇيدىڭ قارجىلىق جاعدايى وزگەرسە، جۇيە ونى اۆتوماتتى تۇردە باسقا ساناتقا اۋىستىرا الادى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ ايتىپ بەردى.