Egov-تىڭ 10 سوتىق جەر الۋعا ءوتىنىمدى نەلىكتەن قابىلداماي جاتقانى بەلگىلى بولدى
«وتكەن اپتادا جەكە تۇرعىن ءۇي سالۋ ءۇشىن جەر تەلىمىن الۋعا كەزەككە قويۋ قىزمەتىن تەستىلەۋ رەجيمىندە ىسكە قوسقان ەدىك. 8- ساۋىردە قىزمەت رەسمي ىسكە قوسىلدى. سول ساتتەن بەرى قىزمەتتى ونلاين فورماتتا 100 مىڭنان استام مارتە قولدانعان. بۇعان قوسا، قىزمەت ىسكە قوسىلعانعا دەيىن ءوتىنىم بەرگەن 1,3 ميلليون كەزەكتەگى ادامدى سيفرلاندىردىق. Egov پورتالى تاراپىنان شەكتەۋ جوق، ءبارى شتاتتىق رەجيمدە جۇمىس ىستەپ تۇر. اكىمدىكتەر كەزەككە قويۋدى ۋاقىتشا توقتاتۋدى وتىنگەن وڭىرلەردە عانا بۇل قىزمەت قولجەتىمدى بولماۋى مۇمكىن. ويتكەنى، ولار كەزەكتە تۇرعان ادامداردىڭ ءتىزىمىن وزەكتەندىرىپ جاتىر»، - دەپ تۇسىندىرەدى مينيسترلىكتەن.
ۆەدومستۆونىڭ اتاپ وتۋىنشە، كەزەككە قويۋ ءوتىنىمىن قابىلداماعان نەمەسە ونى قابىلداۋدان باس تارتقان جاعدايدا ە- ءوتىنىش كومەگى ارقىلى مۇنىڭ سەبەبىن ءتۇسىندىرۋدى تالاپ ەتىپ، جەرگىلىكتى اتقارۋشى ورگانعا جۇگىنۋ قاجەت. بۇعان دەيىن قازاقستاندىقتار جەكە تۇرعىن ءۇي قۇرىلىسىنا جەر الۋ ءۇشىن eGov.kz پورتالى ارقىلى كەزەككە تۇرا الاتىنىن حابارلاعان ەدىك.
ول ءۇشىن eGov.kz پورتالىنا كىرىپ، «جىلجىمايتىن مۇلىك» - «جەر قاتىناستارى» بولىمىنەن «جەكە تۇرعىن ءۇي قۇرىلىسىنا جەر ۋچاسكەسىن (10 سوتىق جەر) الۋعا كەزەكتى قاراۋ نەمەسە كەزەككە تۇرۋ» قىزمەتىن تاڭداۋ قاجەت.