«شاتىرداعى ەكەۋ» فيلمى رەسەيدە ارنايى جۇلدەگە يە بولدى

استانا. KAZINFORM - «شاتىرداعى ەكەۋ» فيلمى رەسەيدە وتكەن «ۆ كرۋگۋ سەمي» حالىقارالىق كينوفەستيۆالى اياسىندا قازىلار القاسىنىڭ ارنايى جۇلدەسىنە يە بولدى.

فيلم ق ر مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن. كارتينا ۇلتتىق بولمىسىمەن جانە مازمۇنىمەن ەرەكشەلەنىپ، جوعارى باعالاندى.

2025-جىلى فەستيۆال رەكوردتىق كورسەتكىشكە قول جەتكىزدى. وعان 121 ەلدەن 2500 دەن استام فيلمگە ءوتىنىم ءتۇستى. ولاردىڭ قاتارىندا قىتاي، تۇركيا، وڭتۇستىك كورەيا، يتاليا، ءۇندىستان، يران، مەكسيكا، سولتۇستىك ماكەدونيا ەلدەرىنىڭ تۋىندىلارى بار. سونىمەن قاتار فەستيۆال تاريحىندا العاش رەت ەفيوپيا مەن سەنەگالدان دا فيلمدەر قابىلدانعان. بايقاۋ باعدارلاماسىنا 36 ەلدەن كەلگەن تولىقمەتراجدى جانە قىسقامەتراجدى فيلمدەر ەندى.

فەستيۆالدە فيلمنىڭ ءتۇپنۇسقا مۋزىكا اۆتورى، كومپوزيتور ۆيكتور سولوگۋب تانىستىردى. كومپوزيتور ماراپاتتى بۇكىل ءتۇسىرىلىم توبىنىڭ اتىنان قابىلداپ، تولقىنىسىن جەتكىزدى. سونىمەن قاتار حيكايانىڭ ەرەكشە قاجەتتىلىكتەرى بار ادامداردى تەرەڭىرەك تۇسىنۋگە جانە قابىلداۋعا سەپتىگىن تيگىزەتىنىن اتاپ ءوتتى.

«شاتىرداعى ەكەۋ» - رەجيسسەر گۇلشات سماعۇلوۆانىڭ تۇڭعىش رەجيسسەرلىك دەبيۋتى. تۋىندى تاعدىرى قيىندىققا تولى جاس جىگىت دامير مەن اۋتيزم دەرتىنە شالدىققان جاس ءوسپىرىم كوستيانىڭ اراسىنداعى دوستىقتى باياندايدى.

شىعارماشىلىق توپ كارتينادا ينكليۋزيانىڭ ماڭىزىن جانە ەرەكشە بالالاردىڭ قوعامعا بەيىمدەلۋ ماسەلەسىن كوتەرگەن. ءتۇسىرىلىم بيىل كوكتەمدە الماتى قالاسى مەن الماتى وبلىسى تالعار اۋدانىندا ءوتتى.

مادەنيەت جانە اقپارات مينيسترلىگى باسپا ءسوز قىزمەتى مالىمەتىنشە، فيلم قازاق جانە ورىس تىلدەرىندە وتكەن جىلى پروكاتقا شىقتى.

ەسكە سالا كەتەيىك، بۇعان دەيىن «گراجدانە كرىشي» حانتى-مانسيسك قالاسىندا وتكەن XXIII حالىقارالىق كينو-دەبيۋتتار فەستيۆالىندە «دۋشا روسسي. ميروۆوە كينو» نوميناتسياسىندا جەڭىسكە جەتكەن بولاتىن. سونداي-اق تۋىندى ءۇندىستانداعى «زولوتوي ليەۆ» حالىقارالىق كينوفەستيۆالى اياسىندا بىردەن ەكى ماراپاتقا يە بولدى. ولار - «ۇزدىك حالىقارالىق تولىقمەتراجدى فيلم» جانە «دەبيۋتتىك فيلم ءۇشىن ۇزدىك رەجيسسۋرا» نوميناتسيالارى.

بۇدان بولەك، فيلم ماسكەۋدە وتكەن Fashion Film Festival فەستيۆالىندە توعىز جۇلدە جەڭىپ الدى.

«شاتىرداعى ەكەۋ» فيلمى حالىقارالىق فەستيۆالدىڭ توعىز جۇلدەسىن جەڭىپ العانىن جازعان ەدىك.

سونىمەن قاتار فيلم ءۇندىستاننىڭ كالكۋتتا قالاسىندا وتكەن «التىن ارىستان» (GLIFF) حالىقارالىق كينوفەستيۆالىندە ەكى اتالىم بويىنشا جەڭىمپاز اتاندى.