بۇل تۋرالى قازاقستاننىڭ اۆياتسيالىق اكىمشىلىگى Kazinform اگەنتتىگىنىڭ رەسمي ساۋالىنا بەرگەن جاۋابىندا مالىمدەدى.
ۆەدومستۆونىڭ تۇسىندىرۋىنشە، مۇنداي جۇمىستى ۇيىمداستىرۋ ءتارتىبى اۋەجايدىڭ كولەمىنە، كۇردەلىلىگىنە، ۇشۋ قارقىندىلىعىنا جانە قۇستارمەن سوقتىعىسۋ قاۋپىنىڭ دەڭگەيىنە بايلانىستى ايقىندالادى.
- وسىعان بايلانىستى اۋەجايدا ارنايى قىزمەت ۇيىمداستىرىلادى نەمەسە ورنيتولوگيالىق قاۋىپسىزدىكتى قامتاماسىز ەتۋگە جاۋاپتى ماماندار تاعايىندالادى. اتالعان قىزمەتكەرلەر باستاپقى جانە مەرزىمدى دايارلىقتان وتۋگە ءتيىس. ولار ۇشۋ قاۋىپسىزدىگىن ورنيتولوگيالىق قامتاماسىز ەتۋ تالاپتارىن، اۋەايلاقتا جۇمىس ىستەۋ كەزىندەگى قاۋىپسىزدىك ەرەجەلەرىن جانە راديوبايلانىس قاعيدالارىن ءبىلۋى قاجەت، - دەلىنگەن جاۋاپتا.
ماسەلەن، نۇرسۇلتان نازاربايەۆ حالىقارالىق اۋەجايىندا ورنيتولوگيالىق قاۋىپسىزدىكتى قامتاماسىز ەتەتىن ارنايى قىزمەت بار. ونىڭ قۇرامىندا قىزمەت باسشىسى مەن التى ورنيتولوگ جۇمىس ىستەيدى. ولار اۋەجاي اۋماعىنداعى قۇستاردىڭ قوزعالىسىن تاۋلىك بويى باقىلاپ، ۇشۋ-قونۋ جولاعى مەن وعان جاقىن جەرلەردى تەكسەرەدى.
اۋەجايدىڭ Kazinform اگەنتتىگىنە بەرگەن جاۋابىنا سايكەس، ماماندار تەكسەرۋ ۋاقىتىن جانە جۇرەتىن باعىتىن ادەيى وزگەرتىپ وتىرادى. بۇل قۇستاردىڭ ولاردىڭ ارەكەتىنە ۇيرەنىپ كەتپەۋى ءۇشىن قاجەت.
سونىمەن قاتار ماماندار اۋەجايدىڭ جۇمىس ەرەكشەلىكتەرىن مەڭگەرىپ، قۇستاردىڭ قاۋىپتى شوعىرلانۋى انىقتالعان جاعدايدا قانداي ارەكەت جاساۋ كەرەكتىگىن بىلۋگە مىندەتتى.
وسىلايشا، اۋەجايلاردا ورنيتولوگيالىق قاۋىپسىزدىكتى قامتاماسىز ەتۋ جۇمىستارى ارنايى ۇيىمداستىرىلعان قىزمەتكە نەمەسە وسى مىندەت جۇكتەلگەن ماماندارعا تاپسىرىلادى.
ەلىمىزدە ۇشاقتار كوبىنەسە قانداي قۇستارمەن سوقتىعىساتىنىن جازعان ەدىك.