ۇشاققا مۋزىكا اسپابىمەن مىنەردە قوسىمشا ورىن الۋ كەرەك بولادى

استانا. KAZINFORM - ەلىمىزدەگى اۋە كومپانياسى جولاۋشىلار ۇشاققا وتىرار الدىندا قول جۇگىنە قاتىستى نەنى ەسكەرۋ كەرەك ەكەنىن ءتۇسىندىردى. بۇگىن ەلوردادا اۋە كولىگى تاقىرىبىنا ارنالعان باسپا ءسوز ءماسليحاتىندا تىلشىلەر اۋە كومپانيالارىنىڭ باسشىلارىنان «جولاۋشىلار وزىمەن بىرگە الىپ جۇرگەن دومبىراعا قوسىمشا اقى تولەۋ كەرەك پە؟» دەگەن سۇراق قويدى.

ءوز كەزەگىندە Air Astana كومپانياسىنىڭ ۆيتسە- پرەزيدەنتى الەكساندر نەبوگا ۇشاق ىشىندەگى قول جۇگى جاشىكتەرىنە كەيبىر زاتتاردى سالۋ مۇمكىن ەمەس ەكەنىن ايتتى.

«ۇشاقپەن كەز كەلگەن زاتتى الىپ جۇرۋگە كەلمەيتىنىن بىلەسىزدەر. بۇل تۇرعىدا قول جۇگى سالىناتىن جاشىكتەردىڭ كولەمىندە دە، ونداعى جۇك سالماعىندا دا بەلگىلى ءبىر شەكتەۋلەر بار. ءتيىستى مۋزىكالىق اسپاپتاردى تاسىمالداۋعا رۇقسات ەتىلەدى، ول ءۇشىن قوسىمشا ورىن الۋ قاجەت. بۇل جاعداي - نەگىزىنەن بارلىق اۆياكومپانيادا قابىلداعان ستاندارتتى الەمدىك تاجىريبە»، - دەپ ءتۇسىندىردى ا. نەبوگا.

ونىڭ سوزىنە قاراعاندا، ەگەر قول جۇگىنىڭ كولەمى ۇشاقتاعى جاشىكتەرگە سىيىپ كەتسە، وندا قوسىمشا تولەم جاساۋدىڭ قاجەتى جوق.

«ەگەر وعان سىيماي تۇرسا، كەز كەلگەن زاتقا قوسىمشا ورىن الۋ كەرەك»، - دەدى كومپانيا وكىلى.

ەسكە سالساق، بىلتىر ايتىسكەر اقىن ايشولپان تىلەۋتاي Fly Arystan ۇشاعىنا دومبىراسىن الىپ كىرۋگە رۇقسات بەرىلمەگەنىن الەۋمەتتىك جەلىدەگى پاراقشاسىندا جازعان ەدى. كەيىن ءماجىلىس دەپۋتاتى ۇشاقتارعا ۇلتتىق اسپاپتاردى كىرگىزبەۋگە قاتىستى اۋە كومپانيالارىنىڭ ارەكەتىن سىنعا الدى.

اۆتور
رۋسلان عابباسوۆ