بۇل ماسەلە شەكارالىق جانە كەدەندىك باقىلاۋدى وڭتايلاندىرۋ، اۋەجايلاردىڭ جۇمىسىن جەتىلدىرۋ جانە جولاۋشىلارعا قىزمەت كورسەتۋ ساپاسىن ارتتىرۋ ماسەلەلەرى قارالعان ۆەدومستۆوارالىق كوميسسيا وتىرىسىندا تالقىلاندى.
ق ر كولىك مينيسترلىگى ازاماتتىق اۆياتسيا كوميتەتىنىڭ مالىمەتىنشە، ءبىرىڭعاي ۋاقىت بەلگىلەۋ اۋەجايلارداعى جولاۋشىلار اعىنىن ءتيىمدى ۇيىمداستىرۋعا، اۋە كومپانيالارى مەن اۋەجايلاردىڭ جۇمىسىن ۇيلەستىرۋگە جانە قىزمەت كورسەتۋ ۇدەرىسىن جولاۋشىلار ءۇشىن تۇسىنىكتىرەك ەتۋگە مۇمكىندىك بەرەدى.
تىركەۋ ۇشۋعا 60 مينۋت قالعاندا اياقتالۋى مۇمكىن
ۇسىنىس قابىلدانسا، ەلدەگى بارلىق اۋەجايدا جولاۋشىلاردى رەيسكە تىركەۋ جانە ولاردىڭ باگاجىن قابىلداۋ ۇشاقتىڭ جوسپارلانعان ۇشۋ ۋاقىتىنان ءبىر ساعات بۇرىن توقتاتىلادى.
قازىر بۇل باستاما تەك تالقىلاۋ ساتىسىندا. ياعني جولاۋشىلار ءۇشىن جاڭا تالاپتىڭ ەنگىزىلگەنى تۋرالى ازىرگە ايتىلعان جوق.
سونىمەن قاتار كوميسسيا اۋەجايلارداعى ارنايى كوميسسيالاردىڭ جۇمىسىن جەتىلدىرۋ ماسەلەسىن قاراستىردى. ولاردىڭ وتىرىستارىن اۋەجاي باعدارلامالارىندا بەلگىلەنگەن مەرزىمگە سايكەس تىكەلەي اۋەجايلاردا تۇراقتى وتكىزۋ ۇسىنىلىپ وتىر.
شەكارالىق جانە كەدەندىك باقىلاۋ دا وزگەرۋى مۇمكىن
جيىندا شەكارالىق باقىلاۋ كەزىندە اۋە كەمەلەرىن تەكسەرۋ ءتارتىبىن وڭتايلاندىرۋ ماسەلەسى دە كوتەرىلدى. قولدانىستاعى راسىمدەردى اۋەجايلاردىڭ وپەراتسيالىق تيىمدىلىگى مەن قازاقستاننىڭ ترانزيتتىك الەۋەتىن ارتتىرۋدى ەسكەرە وتىرىپ جەتىلدىرۋ ۇسىنىلدى.
حالىقارالىق رەيستەرمەن ۇشاتىن جولاۋشىلاردى كەدەندىك باقىلاۋدان وتكىزۋ ءتارتىبى دە تالقىلاندى. بۇل باعىتتا حالىقارالىق تاجىريبەگە سۇيەنە وتىرىپ، تاۋەكەلگە باعدارلانعان ءتاسىلدى قولدانۋ جانە جولاۋشىلار اعىنىن وڭتايلاندىرۋ كوزدەلىپ وتىر.
بۇدان بولەك، اۋەجايلار، اۋە كومپانيالارى جانە مەملەكەتتىك ورگاندار اراسىندا جولاۋشىلاردىڭ ەلگە كەلۋى مەن ەلدەن شىعۋى تۋرالى دەرەكتەردى ەلەكتروندى تۇردە الماسۋ ماسەلەسى قارالدى.
ۇسىنىلىپ وتىرعان وزگەرىستەردىڭ نەگىزگى ماقساتى - اۋەجايلارداعى راسىمدەردى جەدەلدەتۋ، ءتۇرلى قىزمەتتەردىڭ جۇمىسىن ۇيلەستىرۋ جانە جولاۋشىلارعا قىزمەت كورسەتۋدى ىڭعايلى ەتۋ.