مۇنى پەرم پوليتەحنيكالىق ۋنيۆەرسيتەتىنىڭ بەرەزنيكي فيليالىنداعى «تەحنولوگيالىق پروتسەستەردى اۆتوماتتاندىرۋ» كافەدراسىنىڭ مەڭگەرۋشىسى، تەحنيكا عىلىمدارىنىڭ دوكتورى اندرەي زاتونسكي ءتۇسىندىردى.
ونىڭ ايتۋىنشا، پاۋەربەنكتەردەگى ليتي-يوندى اككۋمۋلياتورلار كوپ ەنەرگيا جينايدى. الايدا ليتي وتە بەلسەندى مەتالل بولعاندىقتان، اۋاداعى وتتەگىمەن نەمەسە سۋمەن وڭاي رەاكسياعا تۇسەدى. ەگەر اككۋمۋلياتور زاقىمدانسا نەمەسە ىشىندە اقاۋ بولسا، ول تۇتانىپ كەتۋى مۇمكىن.
مۇنداي جاعدايدا «جىلۋلىق ۇدەۋ» دەپ اتالاتىن قاۋىپتى پروتسەسس باستالادى. ياعني باتارەيا ىشىندەگى تەمپەراتۋرا كۇرت ءوسىپ، تىزبەكتى رەاكتسيا جۇرەدى. ساراپشىنىڭ سوزىنشە، بۇل پروتسەستى توقتاتۋ وتە قيىن.
«ەلەكتروليت تەمپەراتۋراسى 200°C- قا جاقىنداعاندا، اككۋمۋلياتور قابىعىنىڭ ىشىندە تۇتانۋ جۇرەدى. كوپ مولشەردە گاز ءبولىنىپ، باتارەيا جارىلىپ، جالىن شاشۋى مۇمكىن»، - دەيدى عالىم.
ماماننىڭ ايتۋىنشا، قىزىپ كەتۋ تەك سىرتقى زاقىمنان ەمەس، اككۋمۋلياتور ىشىندەگى جاسىرىن اقاۋلاردان دا تۋىنداۋى ىقتيمال. مىسالى، سەپاراتوردىڭ ءبۇلىنۋى نەمەسە دەندريتتەردىڭ پايدا بولۋى قاۋىپتى ارتتىرادى.
ۇشاقتاعى جاعداي بۇل تاۋەكەلدى ودان ءارى كۇشەيتەدى. سەبەبى رەيس كەزىندە تۇراقتى ءدىرىل مەن قىسىم اۋىتقۋى باتارەيا قۇرىلىمىنا اسەر ەتەدى. اسىرەسە ارزان پاۋەربەنكتەر قاۋىپتى سانالادى. ويتكەنى ولاردىڭ قورعانىس جۇيەسى قاراپايىم بولادى جانە تەمپەراتۋرانى تولىق باقىلامايدى.
سمارتفوندار مەن نوۋتبۋكتەر قىزىپ كەتسە، اۆتوماتتى تۇردە قۋاتتى ازايتىپ نەمەسە ءوشىرىپ تاستاي الادى. ال كوپتەگەن پاۋەربانكتەردە مۇنداي قورعانىس قاراستىرىلماعان.
قازىرگى ەرەجەگە سايكەس، پاۋەربانكتەردى جۇك بولىمىنە تاپسىرۋعا بولمايدى: ولار تەك قول جۇگىندە تاسىمالدانادى. سەبەبى سالوندا ءورت شىقسا، ونى بىردەن بايقاپ، سوندىرۋگە مۇمكىندىك بار. ال جۇك بولىمىندەگى ءورتتى دەر كەزىندە انىقتاۋ قيىن.
سونداي-اق ماماندار ۇشۋ كەزىندە تەلەفوندى پاۋەربانك ارقىلى زاريادتاماۋعا كەڭەس بەرەدى. ويتكەنى قۋات بەرۋ بارىسىندا اككۋمۋلياتور قىزادى، ال ۇشاقتاعى جاعداي بۇل قىزۋدىڭ قاۋىپتى دەڭگەيگە جەتۋىن جىلدامداتۋى مۇمكىن.