ۇشاق ەكيپاجدارىنىڭ پسيحيكالىق بەلسەندى زاتتاردى قولدانعان- قولدانباعانى تەكسەرىلەدى
استانا. KAZINFORM – ق ر كولىك مينيسترلىگى ەلىمىزدىڭ ازاماتتىق اۆياتسياسىنداعى مەديتسينالىق كۋالاندىرۋ جانە تەكسەرۋ قاعيدالارىنا وزگەرىستەر مەن تولىقتىرۋلار دايىندادى.
بۇل تۇزەتۋلەر ۇشقىشتاردى، اۋە ديسپەتچەرلەرىن جانە ۇشۋ قاۋىپسىزدىگىن قامتاماسىز ەتۋمەن بايلانىستى باسقا ازاماتتىق اۆياتسيا قىزمەتكەرلەرىن مەديتسينالىق باقىلاۋدى ايتارلىقتاي كەڭەيتۋدى جانە اۆتوماتتاندىرۋدى قامتيدى.
نەگىزگى وزگەرىستەردىڭ ءبىرى - اۆياتسيا قىزمەتكەرلەرىن رەيس الدىنداعى جانە اۋىسىمنان كەيىنگى مەديتسينالىق تەكسەرۋگە ارنالعان اۆتوماتتاندىرىلعان جۇيەلەردى تاجىريبەگە ەنگىزۋ. مۇنداي جۇيەلەرگە قىزمەتكەرلەردىڭ دەنساۋلىعىن تەز جانە وبەكتيۆتى تەكسەرۋگە مۇمكىندىك بەرەتىن قۇرال- جابدىق كىرەدى. اتاپ ايتقاندا، تونومەترلەر، پۋلسومەترلەر، الكوتەستەر، سونداي- اق تەمپەراتۋرانى ولشەۋگە ارنالعان قۇرىلعىلار بار.
اۆتوماتتاندىرىلعان جۇيەلەر قان قىسىمىن، تامىر سوعىسىن، دەنە تەمپەراتۋراسىن ولشەۋگە، الكوگول مەن پسيحواكتيۆتى زاتتارعا تەست جۇرگىزۋگە مۇمكىندىك بەرەدى. بۇل ەڭ ءدال جانە جىلدام ناتيجەلەردى قامتاماسىز ەتەدى.
مەديتسينالىق تەكسەرۋلەر ءداستۇرلى نەمەسە ونلاين رەجيمدە جۇرگىزىلۋى مۇمكىن. ونلاين تەكسەرۋ پروتسەسى تولىعىمەن اۆتوماتتاندىرىلادى: جۇيە تەكسەرۋ ناتيجەلەرىن، سونىڭ ىشىندە فوتو جانە بەينە ءتۇسىرۋدى تىركەيدى، بۇل دەرەكتەردى بۇرمالاۋ مۇمكىندىگىن بولدىرمايدى.
ونلاين تەكسەرۋ ادامدى بيومەتريالىق سايكەستەندىرەدى، شاعىمدار بويىنشا ساۋالنامانى، قاراشىق رەاكسياسىن تەكسەرۋدى، قان قىسىمىن، تامىر سوعىسى مەن باسقا دا تەكسەرۋلەردى قامتيدى. وففلاين مەديتسينالىق تەكسەرۋدە ساۋالناما، سىرتقى تەكسەرۋ، اۋىز قۋىسى مەن جۇتقىنشاقتى تەكسەرۋ، ءپۋلستى زەرتتەۋ، كورسەتىلىمدەر بويىنشا - قان قىسىمىن، دەنە تەمپەراتۋراسىن ولشەۋ جانە الكوگولگە سىناما بار.
بارلىق ناتيجەلەر ۇشۋ الدىنداعى مەديتسينالىق قاراپ-تەكسەرۋ جۋرنالىندا جانە اۋىسىم الدىنداعى (اۋىسىمنان كەيىنگى) مەديتسينالىق قاراپ-تەكسەرۋ جۋرنالىندا تىركەلەدى.
جۋرنال ەلەكتروندى تۇردە جۇرگىزىلگەن جاعدايدا ونداعى مالىمەتتەر ەلەكتروندى سيفرلىق قولتاڭبامەن كۋالاندىرىلادى، بەتتى باسىپ شىعارۋدى مىندەتتەۋ مۇمكىندىگى بار دەربەس دەرەكتەر تۋرالى زاڭنامانىڭ تالاپتارى ەسكەرىلەدى.
مەديتسينالىق تەكسەرۋدىڭ ونلاين فورماتىندا اۆتوماتتاندىرىلعان جۇيە قىزمەتكەردىڭ ناتيجەلەرىن تىركەيدى جانە جۇمىسقا جىبەرۋ تۋرالى شەشىم قابىلدايدى. مەديتسينالىق قاراپ- تەكسەرۋ ناتيجەلەرى، ونىڭ ىشىندە فوتو نەمەسە بەينەتىركەۋ اۆتوماتتاندىرىلعان جۇيە تىزىلىمىندە ساقتالادى جانە ەش تۇزەتىلمەيدى.
قىزمەتكەردىڭ جۇمىسقا جارامدىلىعى تۋرالى قورىتىندى ءبىر مينۋت ىشىندە اۆتوماتتاندىرىلعان جۇيە ارقىلى ەلەكتروندى فورمادا بەرىلەدى.
جاڭا ەرەجەلەردە تەك رەيس الدىنداعى تەكسەرۋلەرگە عانا ەمەس، اۋىسىم اياقتالعاننان كەيىنگى مەديتسينالىق تەكسەرۋلەرگە دە باسا ءمان بەرىلەدى. بۇل جۇمىس بارىسىندا تۋىنداۋى مۇمكىن زياندى فاكتورلار اسەرىنىڭ ىقتيمال سالدارىن انىقتاۋعا مۇمكىندىك بەرەدى. مۇنداي تەكسەرۋلەر شارشاۋ، كاسىپتىك اۋرۋلار نەمەسە زياندى زاتتارمەن ۋلانۋ بەلگىلەرىن ۋاقىتىلى انىقتاۋعا، الكوگولدىك نەمەسە ەسىرتكىلىك ماساڭدىقتى تەكسەرۋگە باعىتتالعان.
سونىمەن بىرگە، تۇزەتۋلەر اۆياتسيا پەرسونالىنىڭ مەديتسينالىق سەرتيفيكاتتارىنا قويىلاتىن تالاپتاردىڭ ساقتالۋىن باقىلاۋدى كۇشەيتەدى. اتاپ ايتقاندا، ۇشۋعا ءقاۋىپ توندىرەتىن اۋرۋدى جاسىرعان جاعدايدا سەرتيفيكاتتىڭ قولدانىلۋىن توقتاتا تۇرۋ كوزدەلەدى. ەگەر قىزمەتكەر ۇشۋ نەمەسە اۋىسىم الدىندا مىندەتتى مەديتسينالىق تەكسەرۋدەن وتپەسە، ول جۇمىستان شەتتەتىلەدى. دەرەكتەردى بۇرمالاۋ نەمەسە ماس كۇيىندە اۋە كەمەسىن باسقارۋ سياقتى بۇزۋشىلىقتار بولعان جاعدايدا سەرتيفيكاتتىڭ قولدانىلۋى توقتاتىلادى، بۇل مىندەتتەردى ورىنداۋ قۇقىعىنان ۋاقىتشا ايىرادى.
مەديتسينالىق سەرتيفيكاتتىڭ قولدانىلۋىن توقتاتا تۇرۋ اۆياتسيا پەرسونالىنىڭ كۋالىگىن توقتاتا تۇرۋعا اكەلەدى، بۇل بۇزۋشىلىقتار جويىلعانشا كاسىبي مىندەتتەردى ورىنداۋعا مۇمكىندىك بەرمەيدى. سەرتيفيكاتتى توقتاتا تۇرۋ مەرزىمى 30 كۇننەن اسپايدى، ال بۇزۋشىلىقتار جويىلماعان جاعدايدا ول تۇپكىلىكتى قايتارىپ الىنۋى مۇمكىن.
قىزمەتكەرلەرگە مەديتسينالىق سەرتيفيكاتتى توقتاتا تۇرۋ نەمەسە كەرى قايتارىپ الۋ شەشىمدەرىنە شاعىمدانۋعا مۇمكىندىك بەرىلەدى.
قۇجات 30-قىركۇيەككە دەيىن جاريا تالقىلاۋ ءۇشىن «اشىق ن ق ا» سايتىندا جاريالانعان.