قازاقستان حالىق كەڭەسىنىڭ مۇشەسى قازا تاپقانداردىڭ تۋعان-تۋىستارىنا جانە قارۋلاس جولداستارىنا كوڭىل ايتتى. ونىڭ سوزىنشە، اسكەري قىزمەتشىلەرگە بەرىلەتىن كومەك اتاۋلى تۇردە، مەملەكەتتىك قولداۋعا قوسىمشا كورسەتىلەدى.
- بۇگىن كاسپيدەگى وقۋ-جاتتىعۋ كەزىندە اسكەري قىزمەتشىلەرىمىز قازا تاپتى. مەملەكەت باسشىسى مارقۇمداردىڭ وتباسىنا كوڭىل ايتىپ، ولارعا بارلىق قاجەتتى كومەك كورسەتۋدى تاپسىردى جانە ەرتەڭگى كۇندى جالپىۇلتتىق ازا تۇتۋ كۇنى دەپ جاريالادى. ەڭ الدىمەن قازاقستان حالىق كەڭەسىنىڭ مۇشەسى رەتىندە، سونداي-اق كاسىپكەر رەتىندە وسىناۋ قايعىنى تەڭدەي ءبولىسۋدى پارىزىم دەپ سانايمىن. پرەزيدەنت قاسىم-جومارت كەمەل ۇلى توقايەۆتىڭ ۇندەۋىن قولداي وتىرىپ، Integra Construction KZ كومپانياسىنان قازا تاپقان ءاربىر اسكەري قىزمەتشىنىڭ وتباسىنا 25 ميلليون تەڭگەدەن قارجىلاي كومەك بولىنەتىنىن حابارلايمىن. كومەك اتاۋلى تۇردە، مەملەكەتتىك قولداۋعا قوسىمشا كورسەتىلەدى. ەشقانداي قاراجات اتا-اناعا بالاسىن قايتارمايدى، ارينە. ءبىراق مۇنداي ساتتە بىردە-ءبىر وتباسى ءوز قايعىسىمەن جالعىز قالماۋى كەرەك. ءبىزدىڭ ەلىمىز قاشاندا وسىنداي ساتتە ءوزىنىڭ بىرلىگىن كورسەتكەن. قازا تاپقانداردىڭ تۋعان- تۋىستارىنا جانە قارۋلاس جولداستارىنا كوڭىل ايتامىن، ولارعا سابىر مەن ءتوزىم تىلەيمىن، - دەپ جازدى شاحمۇرات ءمۇتالىپ Instagram-داعى پاراقشاسىندا.