شاڭحايدا ەر ادام ساۋدا ورنىنداعى ادامدارعا پىشاقپەن شابۋىل جاساپ، 3-ەۋىن مەرت قىلدى

استانا. قازاقپارات - 30-قىركۇيەك كۇنى كەشتە قىتايدىڭ شاڭحاي قالاسىنداعى سۋپەرماركەتتەردىڭ بىرىندە كۇدىكتى پىشاقپەن شابۋىل جاساپ، ءۇش ادامنىڭ ءومىرىن قيدى، دەپ حابارلايدى قىتايلىق ب ا ق.

شاڭحاي قالالىق قوعامدىق قاۋىپسىزدىك باسقارماسىنىڭ بۇگىن تاڭعا جۋىق بەرگەن اقپاراتىنا سايكەس، سۋڭجياڭ اۋدانىنىڭ سۋنحۋي جولىنداعى سۋپەرماركەتتە پىشاقپەن شابۋىل جاساعان 37 جاستاعى لين ەسىمدى ەر ادام وقيعا ورنىندا ۇستالعان.

مالىمدەمە ءتۇرلى دەڭگەيدە جاراقات العان 18 ادامنىڭ اۋرۋحاناعا جىبەرىلگەنى، ولاردىڭ ۇشەۋى جان ساقتاۋ بولىمىندە جاتقان كەزىندە كەزىندە قايتىس بولعانى ايتىلدى.

الەۋمەتتىك جەلىدە تاراپ كەتكەن ۆيدەولاردىڭ بىرىنەن كوگىلدىر كويلەك، قارا شالبار كيگەن ەر ادامنىڭ ەكى قولىنا پىشاق ۇستاپ، سۋپەرماركەتتىڭ قاسىنان ءوتىپ بارا جاتقانىن، ال جۇرگىنشىلەردىڭ جان- جاققا قاشىپ بارا جاتقانىن كورۋگە بولادى.

ال كەلەسى ءبىر بەينەجازبادا پىشاققا جىعىلعان ەكى ادامنىڭ جەردە قانعا بويالىپ جاتقانى كورسەتىلگەن.

قىتاي پوليتسياسىنىڭ اقپاراتىنا سەنسەك، الدىن الا بولجام بويىنشا، 37 جاستاعى كۇدىكتى شاڭحايعا باسقا ايماقتان «جەكە قارجىلىق داۋعا» بايلانىستى «اشۋىن شىعارۋ» ءۇشىن ادەيى كەلگەن.

سۋڭجياڭ - شانحايدىڭ وڭتۇستىك- باتىسىنداعى حالىق تىعىز ورنالاسقان اۋدان، قىتايعا بەلگىلى سۋڭجياڭ ۋنيۆەرسيتەتى قالاشىعى وسى اۋداندا.

ەسكە سالا كەتەيىك، بۇگىن قىتاي حالىق رەسپۋبليكاسى 75 جىلدىق مەرەيتويىن تويلاپ جاتىر.

اۆتور
اسحات رايقۇل