پرەزيدەنت Qarmet كومپانياسىنىڭ ۇيىمشىل ۇجىمى تولايىم تابىسقا تاباندى ەڭبەكتىڭ ارقاسىندا جەتكەنىنە توقتالدى. ول Qarmet جۇمىسشىلارىنىڭ ەرەن ەڭبەگى، كاسىبيلىگى مەن ءوز ىسىنە ادالدىعى كومپانيانى ورگە جەتەلەيتىنىن ايرىقشا اتاپ ءوتتى.
- وسى جيىنعا بىلتىر ەڭ جوعارى ەرەكشەلىك بەلگىسى - «قازاقستاننىڭ ەڭبەك ەرى» اتاعىنا يە بولعان سەرگەي پەتروۆيچ چەرنوباي قاتىسىپ وتىر. سىزدەردىڭ ارالارىڭىزدا Qarmet كومپانياسىنىڭ بۇرىنعى داڭقىن قايتا ورالتۋ ءۇشىن ايانباي ەڭبەك ەتىپ جۇرگەن ازاماتتار بارشىلىق. جەمىستى جۇمىستارىڭىز زور قۇرمەتكە لايىق. مەملەكەتتىڭ ساياساتى وزات جۇمىسشىلار مەن مامانداردى ىنتالاندىرۋعا باعىتتالعان. بىلتىر سىزدەردەي ەڭبەكقور جاندارعا ءىلتيپات كورسەتتىك. ءبىراق مەملەكەتتىڭ سىزدەرگە، ياعني ءوندىرىس جۇمىسشىلارىنا جانە اۋىل شارۋاشىلىعى ەڭبەككەرلەرىنە دەگەن ىزەت-قۇرمەتى وزگەرمەيدى. ءبىز سىزدەردى ءاردايىم قولدايمىز. سوندىقتان مەن ەلىمىزدىڭ يندۋسترياسى مەن ونەركاسىبىن دامىتۋعا ەلەۋلى ۇلەس قوسقان ءبىر توپ ازاماتتى مەملەكەتتىك ناگرادالارمەن ماراپاتتاۋ تۋرالى جارلىققا قول قويدىم. بۇل - وتانىمىزدىڭ يگىلىگى ءۇشىن جاساعان ەسەلى ەڭبەكتەرىڭىزگە بەرىلگەن لايىقتى باعا، - دەدى مەملەكەت باسشىسى.
سونداي-اق پرەزيدەنت بيزنەسكە جان-جاقتى قولداۋ كورسەتۋ قاجەتتىگىن مالىمدەدى.
- جولداۋىمدا مەملەكەت شاعىن بيزنەستى قولداۋ ءۇشىن ءبىرقاتار شارا قابىلدايتىنىن، سونىڭ ىشىندە الداعى ءۇش جىلدا تەكسەرىستەن بوساتاتىنىن ايتقانىمدى بىلەسىزدەر. شاعىن بيزنەس جاڭا سالىق شارتتارىنا ويداعىداي بەيىمدەلۋى ءۇشىن وعان قازىر قول ۇشىن سوزۋ كەرەك دەپ ويلايمىن. كرەديتتى ارزانداتۋ ماقساتىندا كاسىپورىنداردى قارجىلاندىرۋ ماسەلەسىن دە پىسىقتاعان ءجون، - دەدى قاسىم-جومارت توقايەۆ.
وسىدان بۇرىن پرەزيدەنت Qarmet ميللياردتاعان شىعىننان ارىلىپ، تازا پايداعا شىققانىن ايتتى.
بۇعان دەيىن مەملەكەت باسشىسى Qarmet كونۆەرتەر تسەحىنىڭ جۇمىسىمەن تانىسقانىن جازعانبىز.