ۇشاقتاعى ورىندى تاڭداۋ دا ۇشۋ كەزىندەگى كوڭىل-كۇيگە اسەر ەتۋى مۇمكىن ەكەنى بەلگىلى بولدى. Teletext Holidays ساياحات بويىنشا ساراپشىسى ريكي ديۋررانس مازاسىز جولاۋشىلارعا قاي جەردە وتىرعان دۇرىس ەكەنىن ايتتى، دەپ حابارلايدى Tengri Travel Express Daily-گە سىلتەمە جاساپ.
ۇشۋدان قورقاتىندار ءۇشىن ەڭ قولايلى ورىندار
ۇشۋ كەزىندە ۋايىمدايتىندارعا ساراپشى ءدالىز جاعىنداعى ورىندى تاڭداۋعا كەڭەس بەرەدى. ونىڭ ايتۋىنشا، بۇل جاعدايدا جولاۋشى ءوزىن ەركىن سەزىنەدى جانە قاجەت بولعان جاعدايدا ورنىنان ەش كەدەرگىسىز تۇرا الادى.
"ءدالىز جاعىنداعى ورىن ءوزىڭىزدى تىم قىسىلعانداي سەزىنبەۋگە كومەكتەسەدى. دەگەنمەن، كولىكتەگى جۇرەك اينۋ جاعدايىنداعىداي، كەيدە تەرەزە جانىندا وتىرۋ دا كومەكتەسۋى مۇمكىن، سەبەبى كوكجيەككە قاراۋ دەنە سەزىمىن تەڭەستىرۋگە سەپتىگىن تيگىزەدى"، - دەپ ءتۇسىندىردى ريكي ديۋررانس.
تۋربۋلەنتتىلىكتەن قورىققاندا قاي ورىندى تاڭداعان ءجون؟
ەگەر مازاسىزدىقتىڭ باستى سەبەبى تۋربۋلەنتتىلىك بولسا، وندا قانات تۇسىنداعى ورىنداردى تاڭداعان دۇرىس.
"ەگەر ءسىزدى مازاسىزدىقتان گورى تۋربۋلەنتتىلىك كوبىرەك الاڭداتسا، وندا قانات تۇسى - ەڭ ءتيىمدى تاڭداۋ. تۋربۋلەنتتىلىكتەن تولىقتاي قاشىپ قۇتىلۋ مۇمكىن بولماسا دا، قانات - ۇشاقتىڭ ەڭ تۇراقتى بولىگى"، - دەيدى Teletext Holidays ساياحات ساراپشىسى.
ونىڭ سوزىنە قاراعاندا، ۇشاقتىڭ ورتا بولىگىندە تۋربۋلەنتتىلىك كەزىندەگى شايقالۋ ارتقى جاعىنا قاراعاندا ازىراق سەزىلەدى.
قاتتى قوبالجيتىندارعا ارنالعان ورىندار
ۇشۋ كەزىندە ەرەكشە قاتتى قوبالجيتىن جولاۋشىلارعا ريكي ديۋررانس بورتسەرىكتەردىڭ كوز الدىندا بولاتىن ورىندى تاڭداۋدى ۇسىندى.
"ەگەر ءسىز ۇشۋ كەزىندە قاتتى مازاسىزدانساڭىز، جينالمالى ورىندىقتا وتىراتىن بورتسەرىكتەردىڭ كورۋ ايماعىنداعى ورىندى برونداعان ءجون. ولار ۇشۋ بويى ءسىزدى ۇنەمى جۇباتىپ وتىرا المايدى، ءبىراق جانىڭىزدا تاجىريبەلى مامانداردىڭ بارىن ءبىلۋ كوڭىلگە سەنىم ۇيالاتادى"، - دەپ ءتۇسىندىردى ول.
قاي ورىنداردى تاڭداماعان دۇرىس؟
ساراپشى ۇشۋدان قورقاتىن جاندارعا ۇشاقتىڭ ەڭ ارتقى جاعىنداعى ورىندارعا ساقتىقپەن قاراۋعا كەڭەس بەردى.
"ۇشاقتىڭ ەڭ ارتقى بولىگىندە تۋربۋلەنتتىلىك كەزىندەگى شايقالۋ قاتتىراق سەزىلەدى. سونىمەن قاتار قونعاننان كەيىن شىعۋ ءۇشىن ۇزاعىراق كۇتۋگە تۋرا كەلەدى"، - دەدى ريكي ديۋررانس.
سونىمەن قاتار مۇنداي ورىندىقتاردىڭ ارقالىعى شەكتەۋلى دەڭگەيدە قوزعالۋى نەمەسە مۇلدەم قوزعالماۋ مۇمكىن، سونداي-اق ولار اجەتحانا مەن اس بولمەگە جاقىن ورنالاسادى. جولاۋشىلار اعىنى كوپ بولعاندىقتان، مۇندا شۋ دا كوبىرەك بولۋى ىقتيمال.
سوندىقتان ۇشۋ كەزىندە مازاسىزداناتىن جولاۋشىلار ورىن تاڭداعاندا اياققا ارنالعان ورىندى عانا ەمەس، ورىندىقتىڭ قاناتقا، اجەتحاناعا، اس بولمەگە جانە بورتسەرىكتەرگە قاتىستى ورنالاسۋىن دا ەسكەرگەنى ءجون.