ش ى ۇ- نىڭ استانا سامميتى: ءبىزدىڭ قىزمەتىمىزگە باسقا دەرجاۆالار قىزىعۋشىلىق تانىتادى
استانا. KAZINFORM - پرەزيدەنت ش ى ۇ- نىڭ استانا ءسامميتى قارساڭىندا بەلسەندى جۇمىس اتقارعانى ءۇشىن سىرتقى ساياسات ۆەدومستۆولارىنىڭ باسشىلارىنا العىس ايتتى، دەپ حابارلايدى اقوردانىڭ باسپا ءسوز قىزمەتى.
- بۇل سامميت الەمدىك ارحيتەكتونيكادا وتە ماڭىزدى ورىن الاتىن ورتاق ۇيىمىمىزدىڭ تاريحىنا جاڭا پاراق بولىپ ەنەدى دەپ ۇمىتتەنەمىز. شىن مانىندە، شاڭحاي ىنتىماقتاستىق ۇيىمىنا بۇكىل الەم كوز تىگىپ وتىر. ءبىزدىڭ قىزمەتىمىزگە باسقا دەرجاۆالار قىزىعۋشىلىق تانىتادى. ۇيىمعا قاتىستى كوپتەگەن سۇراق قويىلادى. مەن 1996 -جىلى ساۋىردە شاڭحاي ىنتىماقتاستىق ۇيىمىن قۇرۋعا قاتىستىم. ول كەزدە بۇل ۇيىم شاڭحاي بەستىگى دەپ اتالدى. سول ۋاقىتتان باستاپ شاڭحاي ىنتىماقتاستىق ۇيىمىنىڭ رۋحى قالىپتاستى. ءبىز ازياداعى، ەۋرازيا قۇرلىعىنداعى، جالپى الەمدەگى بەيبىتشىلىكتى، قاۋىپسىزدىكتى ساقتاۋ جولىنداعى ىقپالداستىعىمىزدىڭ نەگىزگى قاعيداتتارىن دايەكتى تۇردە نىعايتىپ كەلەمىز. بۇل - وتە دۇرىس قادام، - دەدى قاسىم- جومارت توقايەۆ.
كەزدەسۋگە رەسەي سىرتقى ىستەر ءمينيسترى سەرگەي لاۆروۆ، قىتاي سىرتقى ىستەر ءمينيسترى ۋاڭ ي، پاكىستان پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇحاممەد يسحاك دار، قازاقستان پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ، قىرعىزستان سىرتقى ىستەر ءمينيسترى جەەنبەك كۋلۋبايەۆ، تاجىكستان سىرتقى ىستەر ءمينيسترى سيرودجيددين مۋحريددين، وزبەكستان سىرتقى ىستەر ءمينيسترى باحتييەر سايدوۆ، بەلارۋس سىرتقى ىستەر ءمينيسترى سەرگەي الەينيك، ءۇندىستاننىڭ سىرتقى ىستەر ۆيتسە- ءمينيسترى راۆي داممۋ، يران سىرتقى ىستەر ءمينيسترىنىڭ ورىنباسارى مەحدي سافاري، ش ى ۇ باس حاتشىسى جاڭ مين، ش ى ۇ وڭىرلىك تەرروريزمگە قارسى قۇرىلىمى اتقارۋشى كوميتەتىنىڭ ديرەكتورى رۋسلان ميرزايەۆ قاتىستى.
اۆتور
ەربول جانات