ش ى ۇ ەلدەرىنىڭ بىرلىگىن ارتتىرۋدا ب ا ق-تىڭ ءرولى زور - شىن حايشيۋن
استانا. KAZINFORM - ەلوردادا ش ى ۇ سامميتى قارساڭىندا قىتاي جانە ش ى ۇ ەلدەرى ب ا ق وكىلدەرىنىڭ دوڭگەلەك ۇستەلى ءوتتى. جيىنعا قاتىسقان مەديا سالانىڭ وكىلدەرى مەملەكەتتەردىڭ بىرلىگىن ارتتىرۋدا ب ا ق-تىڭ ماڭىزى زور ەكەنىن اتاپ ءوتتى.
اۋەلى ءسوز العان قىتاي مەديا كورپوراتسياسىنىڭ باسشىسى شىن حايشيۋن قازاق- قىتاي دوستىعىن نىعايتۋدىڭ ماڭىزدىلىعىنا توقتالدى.
«ەكى ەلدىڭ ب ا ق وكىلدەرىنىڭ ءوزارا پىكىر الماسىپ، تاجىريبەمەن ءبولىسۋى جارقىن بولاشاقتى قالىپتاستىرا تۇسەتىنى انىق. قازاق جانە قىتاي حالىقتارىندا بىرلىك تۋرالى ورتاق ماقالدار كوپ. بۇل رەتتە، اقپارات كەڭىستىگىندەگى ىنتىماقتاستىقتى ارتتىرۋ ارقىلى قوس ەلدىڭ دوستىعىن باياندى ەتۋ ءتۇسۋ مۇمكىندىگى مول. جالپى، ءبىز ش ى ۇ ەلدەرىن بىرىكتىرۋ ءۇشىن بىرلەسكەن كۇش-جىگەر جۇمساۋعا دايىنبىز. ۇيىمعا مۇشە ەلدەردىڭ ب ا ق وكىلدەرى ءادىل، وبەكتيۆتى، پوزيتيۆتى جانە سالاۋاتتى جاھاندىق قوعامدىق پىكىر قالىپتاستىرۋ ءۇشىن جۇمىلا جۇمىس ىستەۋىمىز كەرەك»، - دەدى شىن حايشيۋن.
ق ر مادەنيەت جانە اقپارات ۆيتسە-ءمينيسترى قانات ىسقاقوۆ الەمدە تۇراقسىز گەوساياسي جاعداي ساقتالعان ۋاقىتتا ب ا ق-تىڭ شىنايى اقپارات تاراتۋى ماڭىزدى ەكەنىن ەسكە سالدى.
«وسى رايدا، قازاقستان- قىتاي ب ا ق وكىلدەرىنىڭ ءبىر-بىرىمەن تولىمدى اقپاراتپەن الماسۋىنا بار جاعداي جاسالۋعا ءتيىس. وسىلايشا، ەكى ەلدىڭ تۇرعىندارى كەز كەلگەن سالاداعى سوڭعى ءارى ساپالى، باستىسى شىنايى اقپاراتپەن قامتاماسىز ەتىلەدى. قاي كەزدە بولماسىن ب ا ق ءرولى ەرەكشە. قوس ەلدىڭ اراسىنداعى مەديا ارىپتەستىك ودان ءارى جاندانا تۇسەتىنىنە سەنىم مول. جالپى، ش ى ۇ ەلدەرىنىڭ اقپارات اگەنتتىكتەرى اراسىنداعى ىنتىماقتاستىقتى تەرەڭدەتۋ وتە ماڭىزدى»، - دەدى قانات ىسقاقوۆ.
ش ى ۇ-نىڭ بۇرىنعى باس حاتشىسى ۆلاديمير نوروۆ ش ى ۇ ەلدەرى ب ا ق وكىلدەرىنىڭ بىرلەسكەن بەلسەندى جۇمىسى ناتيجەسىندە استاناداعى سامميت الەمدىك كوشباسشىلاردىڭ نازارىن اۋدارتقانىن اتاپ ءوتتى.
«جىل سايىنعى حالىقارالىق فورۋمدا ش ى ۇ-عا مۇشە ەلدەردىڭ باسشىلارى ەۋرازيالىق كەڭىستىكتە بەيبىتشىلىككە، قاۋىپسىزدىككە جانە تۇراقتى دامۋعا بىرلەسىپ كۇش سالادى. ش ى ۇ قازاقستاننىڭ توراعالىعىمەن جاھاندىق قاۋىپسىزدىك پەن دامۋ ماسەلەلەرىن شەشۋدە ايتارلىقتاي تابىستارعا قول جەتكىزدى»، - دەدى ول.
ش ى ۇ-نىڭ تاعى ءبىر بۇرىنعى باس حاتشىسى بولات نۇرعاليەۆ ش ى ۇ ەلدەرىنىڭ اقپارات اگەنتتىكتەرى اراسىنداعى ىنتىماقتاستىقتى تەرەڭدەتۋ باستاماسى قۇپتارلىق ءىس ەكەنىن جەتكىزدى.
«23 جىل قىزمەت ەتىپ كەلە جاتقان بۇل ۇيىم ءوزىن تولىعىمەن ءتيىمدى مەملەكەتارالىق بىرلەستىك رەتىندە كورسەتە ءبىلدى. ش ى ۇ ءوز ماقساتىن ايقىن ورىنداپ، ساياسي، ەكونوميكالىق جانە گۋمانيتارلىق ولشەمدەردەگى ءارتۇرلى ءوزارا ءىس-قيمىلدى قامتاماسىز ەتەدى»، - دەدى ب. نۇرعاليەۆ.
كەزدەسۋ قورىتىندىسى بويىنشا قاتىسۋشىلار قىتاي مەديا كورپوراتسياسى مەن ش ى ۇ ەلدەرىنىڭ ب ا ق اراسىنداعى پراگماتيكالىق ىنتىماقتاستىقتى تەرەڭدەتۋ باستاماسىن ۇسىندى.
اۆتور
ورالحان قوجانوۆ