ش ى ۇ ەلدەرى يزرايلدىڭ يرانعا جاساعان اسكەري شابۋىلىن قاتاڭ ايىپتادى

استانا. KAZINFORM - شانحاي ىنتىماقتاستىق ۇيىمىنا (ش ى ۇ) مۇشە مەملەكەتتەر ءيزرايلدىڭ يران يسلام رەسپۋبليكاسىنىڭ اۋماعىنا جاساعان اسكەري سوققىسىن قاتاڭ ايىپتادى. بۇل تۋرالى ۇيىمنىڭ باسپا ءسوز قىزمەتى مالىمدەدى.

- شانحاي ىنتىماقتاستىق ۇيىمىنا (ش ى ۇ) مۇشە مەملەكەتتەر تاياۋ شىعىستاعى شيەلەنىستىڭ كۇشەيۋىنە ەلەۋلى الاڭداۋشىلىق بىلدىرەدى جانە يزرايلدىڭ 2025 -جىلعى 13-ماۋسىمدا يران يسلام رەسپۋبليكاسىنىڭ تەرريتورياسىنا جاساعان اسكەري سوققىسىن قاتاڭ ايىپتايدى.

بەيبىت تۇرعىنداردىڭ ولىمىنە اكەلگەن ازاماتتىق وبەكتىلەرگە، سونىڭ ىشىندە يادرولىق- ەنەرگەتيكالىق ينفراقۇرىلىمعا قارسى وسىنداي اگرەسسيۆتى ارەكەتتەر بىرىككەن ۇلتتار ۇيىمىنىڭ (ب ۇ ۇ) حالىقارالىق قۇقىعى مەن جارعىسىنىڭ قاعيداتتارى مەن نورمالارىن ورەسكەل بۇزۋ، يراننىڭ ەگەمەندىگىنە قول سۇعۋ بولىپ تابىلادى.

ولار ايماقتىق جانە حالىقارالىق قاۋىپسىزدىككە نۇقسان كەلتىرەدى جانە جاھاندىق بەيبىتشىلىك پەن تۇراقتىلىق ءۇشىن اۋىر زارداپتارعا تولى. ش ى ۇ- عا مۇشە ەلدەر يراننىڭ يادرولىق باعدارلاماسى توڭىرەگىندەگى جاعدايدى تەك بەيبىت، ساياسي جانە ديپلوماتيالىق جولمەن رەتتەۋدى تاباندى تۇردە قولدايدى.

ش ى ۇ- عا مۇشە ەلدەر يران يسلام رەسپۋبليكاسىنىڭ حالقى مەن ۇكىمەتىنە شىن جۇرەكتەن كوڭىل ايتادى.

ش ى ۇ- عا مۇشە مەملەكەتتەر ب ۇ ۇ جارعىسىنىڭ جانە ش ى ۇ جارعىسىنىڭ ماقساتتارى مەن قاعيداتتارىن قاتاڭ ساقتاي وتىرىپ، ش ى ۇ- عا مۇشە مەملەكەتتەرگە قارسى باعىتتالعان كەز كەلگەن زاڭسىز ارەكەتتەرگە جول بەرۋگە بولمايدى دەپ سانايدى جانە حالىقارالىق بەيبىتشىلىك پەن قاۋىپسىزدىكتى نىعايتۋعا دەگەن مىزعىماس ۇستانىمدارىن راستايدى، - دەلىنگەن حابارلامادا.

ەسكە سالا كەتەيىك، جۇما، 13- ماۋسىمعا قاراعان ءتۇنى يزرايل يرانعا جاپپاي سوققى بەردى. بۇعان جاۋاپ رەتىندە تەگەران يزرايلگە قاراي جۇزدەن استام درون ۇشىردى. يران ناتانزەدەگى يادرولىق قوندىرعىنىڭ زاقىمدانعانىن راستادى، ءبىراق رادياتسيانىڭ اعىپ كەتكەنىن جوققا شىعاردى.

يران يزرايلگە زىمىران سوققىلارىنىڭ جاڭا تولقىنىن باستادى. يزرايلدىڭ توتەنشە جاعدايلار قىزمەتى حابارلاعانداي، يراندىق زىمىران اتىسىنان ەكى ادام قازا تاپتى - شامامەن 60 جاستاعى ايەل جانە 45 جاستاعى ەر ادام. تاعى 19 ادام جاراقات الدى، دەپ حابارلادى ءيزرايلدىڭ جەدەل جاردەم قىزمەتى.

يراننىڭ ب ۇ ۇ- داعى وكىلى ءيزرايلدىڭ اۋە شابۋىلى سالدارىنان 78 ادامنىڭ قازا تاپقانىن ايتقان بولاتىن. يراندا 320 دان استام ادام جاراقات الدى.

بۇعان دەيىن يران جوعارى شەندى اسكەري قولباسشىلار مەن جەتەكشى عالىمداردىڭ يزرايل سوققىسى سالدارىنان قازا تاپقانىن راستادى.