ش ق و-دا قازان ايىندا حالىقارالىق بۇركىتشىلەر فەستيۆالى وتەدى

وسكەمەن. KAZINFORM - شىعىس قازاقستان وبلىسىندا قازان ايىندا «شىعىس سالبۇرىنى» حالىقارالىق بۇركىتشىلەر فەستيۆالى وتەدى.

ش ق و اكىمدىگىنىڭ مالىمەتىنە سۇيەنسەك، 10-14-قازان كۇندەرى ۇلان اۋدانى بوزانباي اۋىلىنىڭ ماڭىنداعى «بۇركىت توبە» الاڭىندا ءداستۇرلى «شىعىس سالبۇرىنى» حالىقارالىق بۇركىتشىلەر فەستيۆالى وتەدى.

فەستيۆالگە رەسپۋبليكانىڭ ءار تۇكپىرىنەن جانە شەت ەلدەردەن، اتاپ ايتقاندا موڭعوليادان، ۆەنگريادان، رەسەيدەن، يسپانيادان، قىتايدان 130-دان استام ادام قاتىسادى. نەگىزگى ءىس-شارالار 11-12 -قازانعا جوسپارلانعان. كەلەتىن قوناقتاردىڭ جالپى سانى - 4000-5000 ارالىعىندا.

«بۇركىت توبە» الاڭىندا 20-دان استام كيىز ءۇي تىگىلەدى. وندا تۋريستەر ءۇشىن بۇركىتتەر مەن سۇڭقارلار سايىسى عانا ەمەس، تۇيەگە وتىرۋ، التىباقان، ساداق اتۋ جانە باسقا دا كوپتەگەن ويىن-ساۋىق ۇيىمداستىرىلادى.

«فەستيۆال قوناقتارىنا ءوڭىردىڭ تانىمال گاستروفيرمالارىنان تاماقتانۋ ۇيىمداستىرىلماق. جارىس باعدارلاماسىنا ءتۇرلى ساناتتاعى بۇركىتتەر مەن سۇڭقارلار سايىسى، «تازى» تۇقىمىنداعى جۇيرىك يتتەردىڭ جارىسى، «جامبى اتۋ» جانە «تەڭگە ءىلۋ» دودالارى كىرەدى»، - دەلىنگەن اقپاراتتا.

اۆتور

تالعاتجان مۇحامەتبەك ۇلى