ش ق و- دا «مەرەيلى وتباسى» بايقاۋىنىڭ جەڭىمپازدارى ماراپاتتالدى
وسكەمەن. KAZINFORM - شىعىس قازاقستان وبلىسىندا «مەرەيلى وتباسى» ۇلتتىق بايقاۋىنىڭ قورىتىندىسى شىعارىلدى. بيىلعى جەڭىمپاز - التاي اۋدانىنان كەلگەن قىدىرحانوۆتار وتباسى.
ىنتىماعى جاراسقان، وزگەگە ۇلگى بولارلىقتاي وتباسىلار انىقتالاتىن «مەرەيلى وتباسى» بايقاۋىنىڭ وبلىستىق كەزەڭىنە ءار قالا، اۋداننان ۇزدىك اتانعاندار جينالدى. بۇل بايقاۋدىڭ ماقساتى -وتباسى قۇندىلىقتارىن ناسيحاتتاۋ، جاستارعا وتباسى مەن نەكەنىڭ ماڭىزدىلىعىن كورسەتۋ.
11 وتباسىنىڭ ىشىنەن ءۇشىنشى ورىندى زايسان اۋدانىنان كەلگەن بوزتايەۆتار وتباسى يەلەندى. وتاعاسى باقىتبەك قاناپيا ۇلى مامىر ايىندا سۋعا باتىپ بارا جاتقان 4 بالانى قۇتقارىپ قالعان. جۇبايى ساۋلە جانسەيىت قىزىمەن بىرگە مال ءوسىرىپ، ەتى مەن ءسۇتىن ءوندىرىپ، اۋدان حالقىن تابيعي تازا ونىمدەرىمەن قامتاماسىز ەتۋدە. 5 بالاسى ءبىلىم، دەنساۋلىق ساقتاۋ، ەنەرگەتيكا سالالارىندا جانە قۇقىق قورعاۋ ورگاندارىندا ادال قىزمەت ەتىپ ءجۇر.
ال ەكىنشى ورىنعا ۇلان اۋدانىنان كەلگەن ناجيتبان وتباسى جايعاستى. بۇل وتباسىندا 7 بالا بار. بۇركىت ءوسىرىپ، وبلىستىق جانە رەسپۋبليكالىق جارىستاردا جۇلدەلى ورىنداردى يەلەنىپ كەلەدى. سونداي- اق حالىقارالىق «بۇركىتشى» ءتۋرنيرىن ۇيىمداستىرىپ، وڭىردەگى ءتۋريزمنىڭ دامۋىنا زور ۇلەس قوسۋدا.
«مەرەيلى وتباسى» ۇلتتىق بايقاۋىنىڭ وبلىستىق كەزەڭىنىڭ جەڭىمپازى بولىپ التاي اۋدانىنان كەلگەن قىدىرحانوۆتار وتباسى تانىلدى. وتباسىندا 4 بالا تاربيەلەنۋدە. وتاعاسى اسلان بازاربەك ۇلى ەڭبەك ءپانىنىڭ ۇستازى، قولونەر شەبەرى. جۇبايى ارداق اۋەلبەك قىزى ماتەماتيكا ءپانىنىڭ ءمۇعالىمى. ەكەۋى دە ءوز ماماندىقتارى بويىنشا رەسپۋبليكالىق بايقاۋلاردىڭ جەڭىمپازدارى. قىزدارى ارنا بيىل «التىن بەلگى» يەگەرى اتانىپ، س. امانجولوۆ اتىنداعى شىعىس قازاقستان ۋنيۆەرسيتەتىنە گرانتقا تۇسكەن.
- بۇگىن وسكەمەندە «مەرەيلى وتباسى» ۇلتتىق بايقاۋىنىڭ ماراپاتتاۋ ءراسىمى ءوتتى. بۇعان دەيىن اۋىل، اۋدان، قالالىق كەزەڭدەردە باق سىناپ، جەڭىمپاز اتانعان جانۇيالاردى دا ماراپاتتادىق. بيىل شقو بويىنشا اتاۋلى بايقاۋعا ءار اۋىل- ايماقتان 136 ءوتىنىم كەلىپ ءتۇستى. وبلىستىق كەزەڭدە جەڭىپماز اتانعان وتباسى استانا قالاسىندا وتەتىن بايقاۋدىڭ رەسپۋبليكالىق كەزەڭىندە ءوڭىر نامىسىن قورعاماق، - دەدى وبلىستىق ىشكى ساياسات باسقارماسى باسشىسىنىڭ ورىنباسارى الميرا تولەگەن قىزى.