ش ق و-دا پەش جاعىپ وتىرعان 11 مىڭنان استام ۇيدە قاۋىپسىزدىك ەرەجەلەرى ساقتالماعان

وسكەمەن. KAZINFORM - شىعىس قازاقستان وبلىسىندا قۇتقارۋشىلار جەر ۇيلەردى ارالاپ، تەكسەرۋ جۇرگىزىپ جاتىر. سونىڭ بارىسىندا پەش جاعىپ وتىرعان 11 مىڭنان استام ۇيدە قاۋىپسىزدىك ەرەجەلەرى ساقتالماعانى انىقتالدى.

قىس كەزىندە جەر ۇيلەردەگى ءورت سانى ارتا تۇسەدى. بۇعان بىرنەشە فاكتور سەبەپ. اتاپ ايتقاندا، پەشتى دۇرىس پايدالانباۋ جانە ونداعى اقاۋلار، ەلەكتر قۇرىلعىلارىنا جۇكتەمەنىڭ كوبەيۋى، وتتى ابايسىز قولدانۋ. قاۋىپ-قاتەردى ازايتۋ ءۇشىن ش ق و ت ج د قىزمەتكەرلەرى، پوليتسەيلەر مەن ەرىكتىلەر تۇراقتى تۇردە رەيدتەرگە شىعۋدا. ءۇي يەلەرىنە ءورت قاۋىپسىزدىگىنىڭ ەرەجەلەرى ءجىتى ءتۇسىندىرىلىپ جاتىر.

«ەڭ اۋەلى پەشتەگى جارىقتاردىڭ قانشالىقتى ءقاۋىپتى ەكەنىن جەتكىزەمىز. جاۋاپكەرشىلىگى جوعارى ازاماتتار جازدا پەشىن، ءتۇتىن مۇرجاسىن سىلاپ، اكتەپ، كۇيەدەن تازارتادى. سايىپ كەلگەندە بۇل ءوزىڭىزدىڭ جانە وتباسىڭىزدىڭ قاۋىپسىزدىگى ءۇشىن جاسالادى»، - دەدى دەپارتامەنتتىڭ مەملەكەتتىك ءورت باقىلاۋ باسقارماسىنىڭ باستىعى نۇرجان ءومىرجانوۆ.

قۇتقارۋشىلار پەشتى دۇرىس پايدالانباۋدىڭ سالدارىنان ادام ومىرىنە قاۋىپ تونەتىندىگىن قاتاڭ ەسكەرتتى. ءورت قانا ەمەس كوزگە كورىنبەيتىن گاز دا اسا قاتەرلى. ۋلانۋدىڭ العاشقى بەلگىسى - ادامنىڭ باسى قاتتى اۋىرىپ، تۇنشىعا باستايدى.

جىلىتۋ ماۋسىمى باستالعالى بەرى ت ج د قىزمەتكەرلەرى 90000-نان استام ءۇيدى ارالاپ شىقتى. الەۋمەتتىك وسال توپتارعا جاتاتىن تۇرعىنداردىڭ ۇيلەرىنە ۋلى گازدى انىقتايتىن 550 داتچيك ورناتىلدى.

رەيدتەر بارىسىندا 26000-نان استام بۇزۋشىلىق انىقتالسا، ونىڭ 11000 ى پەشتى دۇرىس پايدالانباۋعا قاتىستى بولىپ وتىر. دەپارتامەنت ماماندارىنىڭ ۋاقتىلى جۇرگىزگەن پروفيلاكتيكالىق شارالارىنىڭ ارقاسىندا تۇرعىندار 22000 نان استام بۇزۋشىلىقتى جويدى.

ەسكە سالساق، وسىعان دەيىن جىلىتۋ ماۋسىمى باستالعالى ەلىمىزدە 913 ءورت تىركەلگەنى حابارلانعان.

اۆتور
تالعاتجان مۇحامەتبەك ۇلى