دزيۋدوشى ماعجان ءشامشاديننىڭ قاشان قاتارعا قوسىلاتىنى بەلگىلى بولدى

استانا. KAZINFORM - ەل نامىسىن 60 كەلىگە دەيىنگى سالماق دارەجەسىندە قورعاپ جۇرگەن دزيۋدوشى، قازاقستان قۇراماسى ۇزدىكتەرىنىڭ ءبىرى ماعجان شامشادين اۋىر جاراقاتتان سوڭ قۇراماعا قايتا ورالادى.

Olympic.kz سايتىنىڭ حابارلاۋىنشا، سپورتشى مامىر ايىنداعى تاجىكستاندا وتەتىن تۋرنيرگە قاتىسپاق. بۇل تۋرالى ماعجاننىڭ باپكەرى قالەن قالي ۇلى ايتقان.

«ماعجان وتكەن ماۋسىمنىڭ سوڭىندا جاراقاتىنا بايلانىستى قاتاردان شىعىپ قالدى. ءبارىمىز ءۇشىن وتە ماڭىزدى سانالاتىن وليمپيادالىق تسيكلدە بىرنەشە تۋرنيردەن قالىپ قويدىق. دەسە دە، ءبىز ءۇشىن ماعجاننىڭ دەنساۋلىعى ماڭىزدى. سوندىقتان، جاراقاتىنان تولىق ايىققاسىن عانا جارىسقا قاتىستىرۋدى دۇرىس دەپ شەشتىك. قازىرگى تاڭدا ماعجاننىڭ دەنساۋلىعى جاقسى. تۇركيانىڭ انتاليا قالاسىندا ءوتىپ جاتقان وقۋ-جاتتىعۋ جيىنىندامىز. مامىر ايىندا تاجىكستاننىڭ دۋشانبە قالاسىندا وتەتىن گران-پري تۋرنيرىنە، كەيىن استانادا وتەتىن Grand Slam تۋرنيرىنە قاتىسامىز دەپ جوسپارلاپ وتىرمىز»، - دەدى سپورتشىنىڭ باپكەرى باپكەر قالەن قالي ۇلى.

ايتا كەتەيىك، بۇگىندە ماعجان شامشادين وليمپيادالىق رەيتينگىدە 24-ورىندا تۇر.