ديزەلمەن جۇرەتىن كولىكتەردىڭ نيۋ-دەليگە كىرۋىنە تىيىم سالىنادى
استانا. قازاقپارات - ءۇندىستان استاناسى نيۋ-دەليدە بۇگىننەن باستاپ ديزەلدى وتىنمەن جۇرەتىن جۇك كولىكتەرىنە شاھارعا كىرۋگە تىيىم سالىنادى.
سونىمەن قوسا قالا اكىمشىلىگى ونەركاسىپتىك ورىندار مەن قۇرىلىس نىساندارىنىڭ جۇمىسىن قاتاڭ باقىلاۋعا الادى. بۇل اۋانىڭ لاستانۋىمەن كۇرەس ماقساتىندا قابىلدانعان شارالار. ويتكەنى اۋاداعى زياندى زاتتاردىڭ مولشەرى دۇنيەجۇزىلىك دەنساۋلىق ساقتاۋ ۇيىمىمەن رۇقسات ەتىلگەن مەجەدەن 130 ەسە اسىپ كەتكەن.
سودان تىنىس الۋ جولدارىنىڭ اۋرۋلارى اسقىنىپ، دارىگەردىڭ كومەگىنە جۇگىنگەن تۇرعىندار سانى ارتتى. ال كوك تۇتىننەن نيۋ-دەليدە كورۋ مۇمكىندىگى ناشارلاپ، كولىك قوزعالىسى قيىنداعان. ۇشاقتار مەن پويىزدار كەشىگىپ جاتىر. ءۇندىستان استاناسىنداعى ەكولوگيالىق احۋالدىڭ ناشارالاۋىنا كولىكتىڭ كوپتىگى سەبەپ. سوسىن كومىر جاعۋ ارقىلى جۇمىس ىستەيتىن ونەركاسىپتىك نىساندار از ەمەس. بۇدان قالدى، شارۋالار دا ماساق ورتەپ، جاعدايدى قيىنداتىپ جىبەرەدى.
24.kz