ديماشتىڭ پولشاداعى جانكۇيەرلەرى قازاقستان تۋرالى ۇستەل ويىنىن قۇراستىردى
استانا. KAZINFORM - ديماش قۇدايبەرگەننىڭ پولشالىق فان- كلۋبى ناۋرىز مەيرامىن ءبىرقاتار مەرەكەلىك ءىس- شارامەن اتاپ ءوتتى. ول ءىس- شارالاردىڭ ءبىرى جانە بىرەگەيى «ديماشپەن بىرگە قازاقستاندى ارالايىق» اتتى ۇستەل ويىنىنىڭ تۇساۋكەسەرى بولدى. بۇل تۋرالى dimashnews حابارلادى.
بۇل ستراتەگيالىق ويىن قاتىسۋشىلاردى ديماش قۇدايبەرگەننىڭ تۋعان جەرىنە ساياحات جاساۋعا شاقىرادى. ويىنشىلار قازاقستاننىڭ كەرەمەت جەرلەرىنە بارىپ، قازاق ەلى مەن مادەنيەتى تۋرالى قىزىقتى دەرەكتەرمەن تانىسادى. ءىس- شارانىڭ باستى سىيلىعى — استاناداعى گيپوتەتيكالىق كونسەرت جانە ديماشپەن كەزدەسۋ بولادى. ويىن پولياك جانە اعىلشىن تىلدەرىندە قول جەتىمدى جانە جاقىن ارادا قازاق جانە يسپان تىلدەرىندە دە جارىق كورەدى. ويىننىڭ اۆتورلارى: ماگدالەنا حولدا، سيلۆيا شايتەر- زيۋلەك، كاتاجينا ستشەلينسكا.
تۇساۋكەسەر ناعىز قازاق داستارحانىن جايعان ۆارشاۆا مۋلتيمادەني ورتالىعىندا ءوتتى. داستارحانعا باۋىرساق، ىرىمشىك، جەنت جانە قۇرت سياقتى ءداستۇرلى تاعامدار قويىلدى. بارلىق تاتتىلەردى جانكۇيەرلەر وزدەرىنىڭ جەكە رەتسەبى بويىنشا دايىنداعان ەكەن.
شاراعا قازاقستان وكىلدەرى ءنۇرالى ومارقۇل مەن نۇرحان ابىشيەۆ قاتىسىپ، ناۋرىز مەيرامىنىڭ تاريحىمەن، ونىڭ سيمۆولدارى — «ناۋرىز كوجە» تاعامى، ۇلتتىق كۇرەس پەن ات بايگەلەرى تۋرالى اقپاراتپەن ءبولىستى. كەزدەسۋ سوڭىندا ولار قازاقتىڭ ادەت- عۇرپى بويىنشا شاشۋ شاشىپ، قوناقتارعا مولشىلىق بولسىن دەگەن نيەتپەن تاتتىلەر تاراتتى.
مەرەكە بارىسىندا ۆارشاۆاداعى «ديماش راديوسىندا» قازاق مۋزىكاسى مەن مەرەكەسىنىڭ مادەنيەتىن تالقىلاۋعا ارنالعان ارنايى حابار ءوتتى. پولياك جانكۇيەرلەرى ديماشپەن كەزدەسۋ ساتتەرىن اسىعا كۇتىپ، الداعى كونسەرتتەرىنە دايىندىق ۇستىندە.
ايتا كەتەلىك اقتاۋدا وتەتىن حالىقارالىق شاراعا ديماش قۇدايبەرگەن قاتىسۋى مۇمكىن.