ديماشتىڭ بومبەرى، شاۆكات راحمونوۆتىڭ فۋتبولكاسى ساتىلعان: ش ق و-دا قايرىمدىلىق بالى ءوتتى
وسكەمەن. KAZINFORM - شىعىس قازاقستان وبلىسىندا «ىزگى كوكتەم» قايىرىمدىلىق بالى ءوتىپ، 30 ميلليون تەڭگەگە جۋىق قاراجات جينالدى.
«Niet woman» قوعامدىق بىرلەستىگى ۇيىمداستىرعان قايىرىمدىلىق بالىنا وبلىستاعى مەتسەناتتار، ءىرى كاسىپورىن باسشىلارى، قوعام بەلسەندىلەرى مەن جاناشىر جاندار قاتىستى. جىل سايىن كوكتەم مەزگىلىنىڭ باسىندا وتكىزىلەتىن شارانىڭ ماقساتى - مۇقتاج جاندارعا كومەكتەسۋ، قايىرىمدى ءىس جاساۋ.
«بىرلەستىگىمىز 2018 -جىلى مامىر ايىندا قۇرىلعان. اۋەلدە كاسىپكەرلىكپەن اينالىساتىن ايەلدەرگە قولداۋ تانىتىپ جۇردىك. كەيىن قوعامدىق شارالارعا ارالاسىپ، قايىرىمدىلىق جاساۋعا بەت بۇردىق. ماسەلەن، 2019 -جىلى دەمەۋشىلەر ارقىلى «عاجايىپتار ەلى» تۇزەتۋ جانە وڭالتۋ ورتالىعىنا قارجىلاي كومەك كورسەتكەن ەدىك. ول كەزدە ورتالىق مۇمكىندىگى شەكتەۋلى 25 بالانى عانا قامتي الاتىن. ال قازىر ونداعى بالا سانى 200 دەن اسىپ وتىر»، - دەيدى «Niet woman» قوعامدىق بىرلەستىگىنىڭ جەتەكشىسى التىناي رامازانوۆا.
بيىلعى بالدا جينالاتىن قارجى اداپتيۆتى سپورت ورتالىعىندا تاربيەلەنەتىن اۋتيزم دياگنوزى بار بالالاردى قولداۋعا، «تەڭ-تەڭىمەن» جوباسى اياسىندا پاراوليمپيادالىق ۇستەل تەننيسى كومانداسىنىڭ سپورتشىلارىنا جانە «جارقىن بولاشاق» الەۋمەتتىك قايىرىمدىلىق جوباسىنا بولىنەدى.
دەمەۋشىلىك تانىتقان كاسىپورىندار مەن جەكە كاسىپكەرلەردەن جينالعان قارجىدان بولەك، قايىرىمدىلىق كەشىندە اۋكسيون وتكىزىلىپ، ءتۇرلى زاتتار ساتىلىمعا قويىلدى. ونىڭ ىشىندە الەمگە ايگىلى ءانشى ديماش قۇدايبەرگەننىڭ ساحناعا كيگەن بومبەرى، UFC جاۋىنگەرى شاۆكات راحمونوۆتىڭ قولتاڭباسى قويىلعان فۋتبولكاسى، وليمپيادا چەمپيونى ولگا رىپاكوۆانىڭ كروسسوۆكاسى بولدى. وسىلايشا، بارلىعى 30 ميلليون تەڭگەگە جۋىق قاراجات جينالدى.
اۆتور
تالعاتجان مۇحامەتبەك ۇلى