ديماشقا ۇقسايدى. ماسكاداعى جىگىت زارداپ شەككەندەرگە 1 ميلليون دوللار ءبولدى
استانا. KAZINFORM - ماسكا تاققان جىگىت سۋ تاسقىنىنان زارداپ شەككەندەرگە ءبىر ميلليون دوللار ءبولدى، دەپ حابارلايدى BAQ. KZ ءتىلشىسى.
ەسىمى بەلگىسىز قايىرىمدى جىگىت بۇل قايىرىمدىلىق ءىسى تۋرالى ءوزىنىڭ الەۋمەتتىك جەلىسىندە جاريالادى.
ءبىز ەڭ اۋقىمدى كوكتەمگى سۋ تاسقىنىمەن كۇرەسىپ جاتىرمىز. توتەنشە جاعداي شامامەن ەلىمىزدىڭ 10 وبلىسىندا جاريالاندى. بۇگىنگى 108 مىڭداي ادام ەۆاكۋاتسيالاندى. سۋ استىندا 5 مىڭنان استام ءۇي قالدى. 8 مىڭنان استام مال قىرىلدى، - دەدى ماسكا تاققان جىگىت.
ول قازىر سۋ تاسقىنىنىڭ ەكىنشى دەڭگەيىنە دايىندىق جۇرگىزىلىپ جاتقانىن اتاپ ءوتتى.
سىزدەرمەن كۇشىمىزدى بىرىكتىرىپ، سۋ تاسقىنىنان زارداپ شەككەندەرگە 1 ميلليون دوللار (450078200 تەڭگە) بولەمىز. ۆولونتەرلەر مەن قۇتقارۋشىلارعا، شەتەلدەن كومەككە كەلگەن ازاماتتارعا شەكسىز العىسىمدى بىلدىرەمىن. بارلىعىمىز بىرگە بۇل تابيعي اپاتتى ەڭسەرەمىز، - دەدى جۇمباق وتانداسىمىز.
ايتا كەتەيىك، بەلگىسىز جىگىتتى الەۋمەتتىك جەلىدە كوبى ءانشى ديماش قۇدايبەرگەنگە ۇقساتىپ جاتىر.