ديماش قىرعىزستاننىڭ حالىق ءارتىسى اتاعى تۋرالى: بۇل ماراپات - ەكى حالىقتىڭ دوستىعىنىڭ نىشانى
استانا. KAZINFORM - بەلگىلى ءانشى ديماش قۇدايبەرگەن قىرعىز رەسپۋبليكاسىنىڭ حالىق ءارتىسى اتاعىن وزىنە كورسەتىلگەن قۇرمەت قانا ەمەس، قىرعىز حالقىنىڭ قازاق حالقىنا دەگەن ءىلتيپاتى رەتىندە قابىلداعانىن مالىمدەدى، دەپ حابارلايدى كابار.
بۇل تۋرالى ول ىستىقكول جاعاسىندا ورنالاسقان چولپون-اتا قالاسىندا ءوتىپ جاتقان «مەيكين ازيا» حالىقارالىق مۋزىكالىق فەستيۆالى اياسىنداعى باسپا ءسوز ءماسليحاتىندا ايتتى.
- ەڭ الدىمەن، قىرعىز رەسپۋبليكاسىنىڭ پرەزيدەنتى سادىر جاپاروۆقا ريزاشىلىعىمدى بىلدىرەمىن. بۇل ماراپاتتى مەن قىرعىز حالقىنىڭ قازاق حالقىنا دەگەن قۇرمەتى مەن مويىنداۋىنىڭ بەلگىسى رەتىندە قابىلدايمىن. قىرعىزستاننىڭ قوناقجايلىلىعىنا جانە ونەر ادامدارىنا دەگەن ىقىلاسىنا شىن جۇرەكتەن ءتانتىمىن، - دەدى ديماش.
سونداي-اق ول فەستيۆالدى جوعارى دەڭگەيدە ۇيىمداستىرعانى ءۇشىن ۇيىمداستىرۋشىلارعا العىس ايتىپ، الداعى ۋاقىتتا دا قوس باۋىرلاس حالىقتىڭ مادەني بايلانىسىن دامىتۋعا ۇلەس قوسا بەرەتىنىن جەتكىزدى.
بۇعان دەيىن، «مەيكين ازيا» فەستيۆالى اياسىندا، قىرعىز رەسپۋبليكاسىنىڭ پرەزيدەنتى سادىر جاپاروۆتىڭ قولداۋىمەن ديماش قۇدايبەرگەنگە قىرعىز رەسپۋبليكاسىنىڭ حالىق ءارتىسى اتاعى بەرىلگەن.
بۇل ماراپات قىرعىزستان مەن قازاقستان اراسىنداعى مادەني ىنتىماقتاستىق پەن دوستىقتى نىعايتۋعا قوسقان زور ۇلەسى ءۇشىن تابىستالدى.