ديماش قۇدايبەرگەننىڭ 17 كونسەرتىنە بارعان پولشالىق جانكۇيەرى قازاق ءتىلىن ۇيرەنىپ ءجۇر
استانا. KAZINFORM - الەمگە ايگىلى ءانشى، وتانداسىمىز ديماش قۇدايبەرگەننىڭ كونسەرتىنە الەمنىڭ تۇكپىر-تۇكپىرىنەن كورەرمەن كەلدى. كونسەرت الدىندا پولشا ەلىنەن كەلگەن ءبىر توپ جانكۇيەردى كەزدەستىردىك، سولاردىڭ ءبىرى تەرەزا كاكولمەن تىلدەسكەن ەدىك.
تەرەزا كاكولمەن بىرگە 14 جانكۇيەر پولشادان ديماش قۇدايبەرگەننىڭ كونسەرتىنە ارنايى كەلىپتى، ولار ەلوردادا ءۇش كۇن بولماق.
«ديماش قۇدايبەرگەننىڭ ءار كونسەرتى - ونىڭ جانكۇيەرلەرى ءۇشىن ەرەكشە مەرەكە. ونىڭ كونسەرتىندە بولۋ - ديماشتىڭ ءاربىر تىڭدارمانى ءۇشىن ارمان. ونىڭ ۇستىنە جەكە كونسەرتى تۋعان جەرى قازاقستاندا بولىپ جاتىر. بۇگىنگى ءان كەشى ەرەكشە وتەدى دەپ تاعاتسىزدانا كۇتىپ وتىرمىز. ءبىز قازاقستانعا كەلگەنىمىزگە قۋانىشتىمىز»، - دەدى تەرەزا كاكول.
پولشالىق تەرەزا كاكول ديماشتىڭ 7 جىلدان بەرى جانكۇيەرى، وسى ۋاقىت ىشىندە ايگىلى ءانشىنىڭ ءار ەلدە بولعان 17 كونسەرتىندە بولعان.
«ديماشتىڭ داۋسى ەرەكشە، جوعارى نوتالاردى ەركىن مەڭگەرەدى جانە ۆوكالدىق دياپازونى كەڭ. ديماشتى ۇزدىكسىز تىڭداۋعا بولادى. پولشادا ديماشتىڭ جانكۇيەرلەر بازاسى بار، شامامەن 15 مىڭ ادامنان تۇرادى»، - دەيدى ول.
شەتەلدىك مەيمان ەلىمىزدىڭ بىرنەشە وڭىرىندە بولعان.
«قازىر ديماشتىڭ پولشالىق جانكۇيەرلەرى قازاق ءتىلىن ۇيرەنىپ ءجۇرمىز. ءبىز ديماشتىڭ انا ءتىلىن ەركىن تۇسىنگىمىز كەلەدى. ۆارشاۆادا ءتورت جىلدان بەرى «ديماش» اتاۋىمەن راديو جۇمىس ىستەپ تۇر. راديودا ديماشتىڭ اندەرىنەن باسقا دا قازاق اندەرى وينايدى. سونىمەن قاتار راديو تىڭدارماندارىمەن قازاق ءتىلىن بىرگە ۇيرەنەمىز. راديوداعى باعدارلامانى مەن جۇرگىزەمىن، ءبىراق ازىرگە قازاقشام ءماز ەمەس، ۋاقىت كەرەك»، - دەيدى ول.
بۇعان دەيىن ديماش قۇدايبەرگەننىڭ جانكۇيەرلەرى «استانا ارەنا» الاڭىنا جينالىپ جاتقانىن جازعان ەدىك. ەسكە سالايىق، ديماش قۇدايبەرگەن V دۇنيەجۇزىلىك كوشپەندىلەر ويىندارىنىڭ اشىلۋ سالتاناتىندا ونەر كورسەتتى. سونداي-اق، ۇلتتىق مۋزەيدە ديماش قۇدايبەرگەننىڭ شىعارماشىلىعىنا ارنالعان كورمە اشىلدى.
«دۇنيە ديدارىنداعى ديماش» كورمەسىنە قازاق جانىنىڭ بولمىسىن بەينەلەيتىن، ونىڭ قايتالانباس ءۇنىن قالىپتاستىرعان، ومىرىندەگى ەلەۋلى وقيعالار تۋرالى حابار بەرەتىن قۇندىلىقتار، تانىمال تۇلعالار مەن كوپتەگەن جانكۇيەردىڭ سىيلىعى قويىلعان.
اۆتور
داۋلەت ىزتىلەۋ