ديماش قۇدايبەرگەن «تاۋ ىشىندە» اتتى جاڭا انىنە چەللەندج جاريالادى

استانا. KAZINFORM - وسى انگە تۇسىرىلگەن جانە ەڭ كوپ قارالىم جيناعان قىزىقتى ۆيدەو اۆتورىنا ۇلكەن سىيلىق بەرىلەدى، دەپ حابارلايدى Dimashnews.

15- مامىر كۇنى ساعات 20:00 دە (استانا ۋاقىتىمەن) ديماش قۇدايبەرگەننىڭ YouTube جەلىسىندە «تاۋ ىشىندە» اتتى جاڭا بەينەبايانىنىڭ پرەمەراسى وتەدى.

پرەمەراعا وراي چەللەندج جاريالاندى: وسى ترەككە تۇسىرىلگەن جانە ەڭ كوپ قارالىم جيناعان قىزىقتى ۆيدەو اۆتورىنا ۇلكەن سىيلىق دايىن.

شارتتارى:

ۆيدەونىڭ ۇزاقتىعى 30 سەكۋندقا دەيىن بولۋى كەرەك.
TikTok نەمەسە Instagram پلاتفورمالارىندا جاريالاۋ.
حەشتەگ: #TauIshindeChallenge.
— چەللەندج 2025 -جىلعى 8-مامىر مەن 25-مامىر ارالىعىندا وتەدى. جۇلدە - جەڭىمپاز ءوز تاڭداۋى بويىنشا ديماش قۇدايبەرگەننىڭ جەكە كونسەرتىنە جولداما الادى (بارسەلونا، بەرلين، لوندون نەمەسە ريگا). ۇشۋ جانە تۇرۋ شىعىندارى تولىق قامتىلادى. ناتيجەسى - 26 -مامىردا الماتى قالاسىندا وتەتىن فان- كەزدەسۋدە جاريالانادى، - دەلىنگەن حابارلامادا.

بۇعان دەيىن TikTok جەلىسىندە ديماش قۇدايبەرگەننىڭ The Story of One Sky اتتى ءانىنىڭ ءۇزىندىسى كەڭ تاراپ، جاستار اراسىندا ءازىل-قالجىڭ تۋدىردى. ارتىنشا ديماش جەلىدەگى ازىلگە قاتىستى پىكىر ءبىلدىردى.