ديماش قۇدايبەرگەن پرەزيدەنت تارتۋ ەتكەن تازىنى كورسەتتى
استانا. KAZINFORM - الەمگە ايگىلى ءانشى، جەرلەسىمىز ديماش قۇدايبەرگەن مەملەكەت باسشىسى سىيعا تارتقان تازىمەن تۇسكەن سۋرەتىن جاريالادى.
«وسىدان بىرنەشە اي بۇرىن مەملەكەت باسشىسى قاسىم-جومارت كەمەل ۇلى تازى سىيلاپ، ەرەكشە تارتۋ جاساعان ەدى. وعان «عارىشكەر» دەپ ات قويىپ، سودان بەرى سەنىمدى سەرىگىمە اينالعان بولاتىن. جەتى قازىنانىڭ بىرىنە سانالاتىن تازىنى قازاق حالقى قادىرلەي بىلگەن»، - دەگەن جازبا قالدىردى ديماش قۇدايبەرگەن Instagram پاراقشاسىندا.
سونداي- اق، ءانشى مەملەكەت باسشىسىن تۋعان كۇنىمەن قۇتتىقتادى.
«وسىنداي تاماشا، باعا جەتپەس قازىنانى تارتۋ ەتكەن ەل پرەزيدەنتى قاسىم-جومارت كەمەل ۇلىن تۋعان كۇنىمەن شىن جۇرەكتەن قۇتتىقتايمىن! سىزگە ەلگە قىزمەت ىستەۋ جولىندا قاجىماس قايرات، كۇش- قۋات تىلەيمىن! سىزگە شىن جۇرەكتەن زور دەنساۋلىق، سارقىلماس قۋات جانە وتانىمىزدىڭ يگىلىگى ءۇشىن جاڭا جەتىستىكتەر تىلەيمىن. ەل بولاشاعى جارقىن بولسىن!»، - دەپ تىلەك ايتتى.
ەسكە سالا كەتسەك، بىلتىر كۇزدە مەملەكەت باسشىسى قاسىم-جومارت توقايەۆ ءانشى ديماش قۇدايبەرگەنگە تازىنىڭ كۇشىگىن سىيلاعان ەدى.